Түркияда коронавирус жуктуруп алган алгачкы адам катталды. Бул тууралуу түрк басылмалар жазып чыкты.

Маалыматка караганда окуя, 10-март күнү болгон. Европадан кайтып келген түрк жаранын аэропорттон текшерүүгө алганда, андан коронавирустун белгилери байкалган.

Бул тууралуу өлкөнүн саламаттык сактоо министри Фахреттин Коджан “ Кечинде өлкөбүздүн бир жараны коронавируска шектелип, аны текшерүүгө алганыбызда жыйынтыгы терс көрсөткүчтөрдү көрсөттү”,- деп билдирди министр.

Мындан тышкары министр учурда бейтап карантинге алынып, дарыгерлердин көзөмөлүндө экенин жана анын үй-бүлөсүн, жакын жүргөн адамдарын текшерүүгө алып жатышканын кошумчалады.

Эске сала кетсек, 11-марттагы маалыматка ылайык, дүйнө жүзү боюнча жаңы типтеги коронавирусту 119 086 адам жуктуруп, анын көбү сакайды (65 762). Ал эми каза тапкандардын саны 4 284кө жетти. Илдет көп катталган өлкөлөр Кытай, Италия, Иран, Түштүк Корея жана Франция болууда.

Булак: NazarNews.kg