Бишкек жана Ош шаарларында 100 орундуу эки оорукананын куруу иштерин тез арада баштоо керек. Мындай тапшырманы премьер-министр Кубатбек Боронов республикалык ыкчам штабдын жыйынында берди.

Премьер-министр белгилегендей, эки шаарда курула турган ооруканалардын орду жана долбоору даярдалууда.

"Бишкек жана Ош шаарларында ооруканалардын курулушун ушул аптанын ичинде баштоо керек. Бул иштерге өкмөткө караштуу Архитектура, курулуш жана турак жай коммуналдык чарба мамлекеттик агенттиги жооптуу. Ал эми Саламаттыкты сактоо министрлиги аталган медициналык мекемелерди тийиштүү жабдуулар менен камсыз кылуусу зарыл", - деди Кубатбек Боронов.

Республикалык штабдын отурумунда өлкө аймактарында колдонулбай турган бош имараттардын багыты өзгөртүлүп, ооруканага ылайыкташтырылары дагы айтылды.

"Өкмөттүн облустардагы ыйгарым укуктуу өкүлчүлүктөрү Архитектура, курулуш жана турак жай коммуналдык чарба агенттиги менен биргеликте колдонулбай турган имараттарды тез арада оңдоп-түздөөдөн өткөрүүгө тийиш. Алар бир айдын ичинде медициналык мекеме катары иштей башташы керек. Ооруканалар 100 бейтапка ылайыкталып, анын ичинен 25-30у жандандыруучу орун болсун", - деди өкмөт башчы.

Жыйындын жүрүшүндө республикалык ыкчам штаб тарабынан берилген аймактарда кошумча орундарды даярдоо боюнча тапшырманын аткарылышы талкууланып, премьер-министр Ысык-Көл жана Жалал-Абад облустарынын жетекчилеринин бул багыттагы ишине сын айтты.

Ошондой эле отурумда тармактык мамлекеттик органдарга эпидемиологиялык кырдаалды турукташтыруу боюнча көрүлүп жаткан иш-аракеттерди күчөтүү тапшырмасы берилди.

Булак: NazarNews.kg