15-июнь, саат 09:00гө карата мамлекеттик чек аранын кыргыз-тажик тилкесинде абал салыштырмалуу туруктуу деп мүнөздөлүүдө. Бул тууралуу КР Улуттук коопсуздук мамлекеттик комитетинин Чек ара кызматынын маалымат жана коммуникация башкармалыгынан билдиришти.

Маалыматка ылайык, түн тынч өттү, эч кандай терс окуялар, чыр-чатактар катталган жок.

Кечээ, 14-июнда, саат 19:30дан 20:35ке чейин кыргыз-тажик мамлекеттик чек арасынын башка тилкелеринде чыр-чатактарды болтурбоо максатында Баткен облусунун Баткен районуна караштуу Төрт-Көчө жерлигинде Кыргызстандын Баткен багыты менен Тажикстандын Исфара багыты боюнча чек ара өкүлдөрүнүн жолугушуусу болуп өттү.

Жолугушууга тараптардын жооптуу аймактардагы чек ара заставаларынын башчылары да катышты.

2022-жылдын 14-июнунда Булак-Башы жерлигинде орун алган куралдуу чыр-чатактын жагдайларын эске алуу менен, ошондой эле мамлекеттик чек аранын башка аймактарында кырдаалдын курчушуна жол бербөө максатында, тараптардын чек ара заставаларынын башчыларына кырдаалдын курчушуна жол бербөө жана жоопкерчиликтүү аймактарда кырдаалды жөнгө салуу тапшырмасы берилди.

Кийинчерээк саат 20:40тан 21:20га чейин Кыргыз Республикасынын “Кызыл-Бел-авто жол” жана Тажик Республикасынын “Гулистон-авто жол” өткөрүү пункттарынын ортосунда Кыргыз Республикасынын Баткен жана Тажик Республикасынын Согди облустары боюнча чек ара өкүлдөрүнүн кезектеги жолугушуусу тараптардын укук коргоо органдарынын облустук башкармалыктарынын жетекчилеринин катышуусунда болуп өттү.

Сүйлөшүүлөрдүн жыйынтыгында төмөнкүдөй чечимдер кабыл алынды:

- тараптардын чек ара өкүлдөрүнүн (отряддардын башчыларынын) жана жооптуу аймактардагы заставалардын башчыларынын жолугушуусунда кабыл алынган чечимдердин аткарылышын көзөмөлдөөнү жүзөгө ашырат;

- тараптардын чек ара өкүлдөрүнүн орун басарларына Булак-Башы жерлигинде жайгашкан чек ара посттордун ишмердүүлүгүн көзөмөлдөө тапшырмасы коюлду.

Бул жолугушууда мамлекеттик чек арага жакын жердеги айыл чарба иштери боюнча да маселе каралды.

Бардык жагдайларды эске алуу менен тараптар мамлекеттик чек ара сызыгына жакын жерде айыл чарба иштерин жүргүзүүгө жол бербөө чечимин кабыл алышты.

Эске салсак, 3-июнда кыргыз-тажик чек арасында Баткен облусуна караштуу Булак-Башы аймагында атышуу болуп, кыргыз тараптан эки жоокер жарадар болгон. Саламаттык сактоо министрлиги жаракат алгандардын биринин абалы өтө оор экенин, бейтап жасалма дем алдыруучу аппаратка туташтырылганын айткан. Ал эми экинчи чек арачынын абалын орто деп баалаган.

Мындан улам эки жоокер Баткенден Бишкектеги ооруканага которулуп, президент Садыр Жапаров алардан кабар алган.

Булак: NazarNews.kg