Кыргыз эл артисти, обончу жана композитор Калыйбек Тагаев дүйнө салды
Маданият  |   |  1714

Кыргыз эл артисти, обончу жана композитор Калыйбек Тагаев 80 жаш курагында дүйнө салды. 

Маркумдун жакындарынын айтымында, Тагаев көптөн бери ооруп жүргөн. Жакында эле ооруканадан чыгарылып, үйүндө төшөктө жатканы кошумчаланды.

Улуу композитордун сөөгү, 18-сентябрь күнү Бишкекте «Ала-Арча» көрүстөнүнө коюлат.

Тагаев Калыйбек Ат-Башы районунун Бирлик айылында 1940-жылы 14-апрелде жарыкка келген. 1961-жылы Каракол педагогикалык институтунун музыка бөлүмүн аяктаган.

Белгилей кетсек, элине эмгеги сиңген улуу композитор, мажордук музыканын атасы атыккан Тагаев 120дан ашык обондун автору. Анын "Ат-Башым", "Элмира", "Долон", "Ак куулар Көлдө термелет", "Назгүлүм" баштаган чыгармалары классикага айланып, эл жүрөгүнөн түнөк тапкан. 60ка жакын обону Кыргыз радиосунун "Алтын казынасына" жазылып алынган. Ал эми 1992-жылы Кыргыз Республикасынын маданиятына эмгек сиңирген ишмер, беш жылдан кийин Кыргыз Республикасынын эл артисти наамдары берилген.

Булак: NazarNews.kg

Поделитесь с друзьями