Кытайда азык-түлүк базарында жарылуу болуп, кеминде 12 адамдын өмүрү кыйылды, дагы 138 адам жараат алды. Окуя 13-июнда Шиян (Борбордук Кытай, Хубэй провинциясы) шаарында болду, жабыркагандарды издөө иштери уланууда.

Мамлекеттик телеканалдар жараат алгандардын 37синин абалы оор экенин кабарлоодо.

Таң эрте болгон жарылуудан базардын имараты толук талкаланып, тегерек-четтеги үйлөрдүн айнектери сынып кеткен. Алдын ала маалыматтарга караганда, кырсыкка газ чыгып, өрт тутанганы себеп болгон. Шаарда кан куюу боюнча кошумча бекеттер иштей баштады.

Булак: NazarNews.kg