"Патриоттор" партиясынын лидери Флориан Филиппо Франция президенти Эммануэль Макрондун Украинанын аймагында Россияны ок атышпоого мажбурлоо тууралуу билдирүүсүн сынга алды. Бул тууралуу ал X социалдык тармагындагы баракчасында жазган.

"Бул эмнеси деген сөз?! Мажбурлоо — дагы көп курал, акча, ал тургай француз аскерлерин Украинанын аймагына жөнөтүү дегенди билдиреби?! Жок, бул ок атышууну токтотуу аракети эмес, бул үчүнчү дүйнөлүк согушту даярдоо! Сиздер биринчи күндөн бери ушул эле нерсени жасап келесиздер!" — деп айтылат билдирүүдө.

Өткөн жума күнү Европа дипломатиясынын башчысы Кая Каллас Европанын Украина боюнча коалициясынын жыйыны натыйжасыз болгонун моюнуна алды, анткени катышуучу өлкөлөрдүн тынчтык орнотуу боюнча көз караштары ар башка.

Бейшемби күнү AFP агенттиги европалык чиновниктерге таянып, коалициядагы 30дан ашык өлкөнүн ичинен болжол менен алтоо Украинага аскер жөнөтүүгө даяр экенин кабарлаган. Алардын катарында Улуу Британия, Франция жана Балтия өлкөлөрү бар.

Россиянын тышкы иштер министри Сергей Лавров март айынын башында Украинага европалык аскердик контингент жайгаштыруу маселеси боюнча компромисске жетишүү мүмкүн эмес экенин билдирген. Министрдин айтымында, эгер чет элдик аскерлер жайгаштырылса, Батыш өлкөлөрү тынчтыкты жөнгө салуу шарттарына макул болуудан баш тартышат, анткени бул контингент "жер үстүндө болгон чыныгы абалды" жаратып коёт.