«Биз Жогорку Кеңештин депутаттыгына талапкерлердин баарына бирдей шарт түзүүнүн үстүндө иштеп жатабыз», - дейт шайлоо комиссиясына колдоо көрсөтүү боюнча республикалык штабдын төрагасы Марат Иманкулов. Анын айтымында, Борбордук шайлоо комиссиясы штаб менен бирдикте 28-ноябрда өтө турган Жогорку Кеңештин депутаттарын шайлоону таза, адилеттүү, мыйзамдуу жана ачык-айкын өткөрүүгө бардык күчүн жумшайт.

«Биз 30 жыл бою административдик ресурсту колдонуу, добуштарды массалык түрдө сатып алуу жана шайлоонун жыйынтыктарын бурмалоо сыяктуу шайлоо иштерин коштогон тенденцияны жок кылышыбыз керек», - деди ал. Штабдын төрагасы азыркы учурда Борбордук шайлоо комиссиясынын ыкчам реакция кылуу координациялык тобу түзүлгөнүн да айтат.

«Ошентип, учурда талапкерлер тарабынан шайлоо процессин бузууга байланыштуу 5-6 кайрылуу түштү. Мисалы, Нарын облусунда талапкерлердин бири жолго шагыл төшөгөн, Кадамжай районунда талапкер мектеп окуучуларын жаңы мектеп формасы менен камсыздаган», - деп кошумчалады ал. Жыйынтыгында Иманкулов талапкерлер меценаттык ишмердүүлүк менен шайлоо процесси жүрүп жаткан учурда эмес, башка убакта алектениши керектигин эске салды.

Эскерте кетсек, министрлер кабинетинин төрагасы тарабынан 28-ноябрга белгиленген ЖК депутаттарын шайлоону даярдоодо жана өткөрүүдө уюштуруу-техникалык маселелерди чечүү үчүн шайлоо комиссияларына жардам берүү боюнча республикалык штаб түзүлгөн.

Булак: NazarNews.kg