2021-жылы социалдык объектилерди куруу боюнча пландын алкагында №4 Бишкек шаардык клиникалык ооруканасынын аймагына инновациялык оорукана курулат. Бул тууралуу «Кабар» агенттигиндеги маалымат жыйынында Бишкектин жер маселелери, архитектура жана курулуш боюнча вице-мэри Азамат Сагындык уулу билдирди.

Анын айтымында, борбор калаада үстүбүздөгү жылга пландын алкагында бир нече жаңы муниципалдык объекттер курулат:

- №4 БШКО аймагына 3 кабаттуу жаңы инновациялык оорукана курулат;

- №3 медициналык тез жардам шаардык балдар клиникасы ооруканасынын аймагына жаңы корпус курулат;

- №6 шаардык клиникалык ооруканасынын аймагына жаңы корпус курулат;

- «Бакай-Ата» конушуна фельдшердик-акушердик пункт курулат.

«Объекттерди курууга дээрлик 50 млн сом шаардын бюджетине киргизилгенин белгилеп кетким келет. Ошондой эле эл аралык донорлор өнөктөштүк жардам көрсөтүшөт», - деди ал.

Өз кезегинде Бишкек мэриясынын капиталдык курулуш башкармалыгынын башчысы Гүлмира Жумабекова жакын арада борбор калаада төмөнкү саламаттык сактоо объектери пайда болорун кошумчалады:

- «Көк-Жар» конушунда – 150 орунга ылайыкталган инновациялык оорукана;

- «Дордой» конушунда – жаңы үй-бүлөлүк дарыгерлер борбору;

- Семетей көчөсү 31 дарегинде – үй-бүлөлүк дарыгерлер борбору;

- №1 шаардык клиникалык ооруканасынын аймагында – жаңы инновациялык корпус;

- №4 шаардык перинаталдык борборунда – скрининг-борбор корпусу.

Булак: NazarNews.kg