Өзбекстан Республикасынын Президенти Шавкат Мирзиёев менен Казакстан Республикасынын Президенти Касым-Жомарт Токаевдин чакан раундунда сүйлөшүүлөр болду.

Жолугушуунун башында Өзбекстандын башчысы казак кесиптешин жана Казакстандын көп улуттуу элин 16-декабрда белгиленүүчү Эгемендүүлүк күнү менен чын жүрөктөн куттуктады.

Лидерлер бул сүйлөшүүлөр Өзбекстан-Казакстан стратегиялык өнөктөштүк жана союздук мамилелерди өнүктүрүүгө жаңы күчтүү импульс берерине ишеним билдиришти.Шавкат Мирзиёев Казакстан Өзбекстандын эң жакын жана ишенимдүү өнөктөшү экенин белгиледи.

«Өзбек жана казак элдери жакын коңшу гана эмес, жалпы тарыхый мурастар, маданий жана руханий баалуулуктар менен байланышкан бир туугандар. Бул биздин баа жеткис байлыгыбыз, аны биз баалайбыз. Тагдырыбыз, келечегибиз бир, мен ага ишенем», - деди Шавкат Мирзиёев.

Сүйлөшүүлөрдүн негизги темасы саясий, соода-экономикалык, энергетика, айыл чарба, суу жана башка тармактарда мамилелерди түп тамырынан бери кеңейтүү болду. Эки өлкөнүн өкмөттөрүнүн, министрликтеринин жана ведомстволорунун, аймактарынын ортосундагы диалогдор үзгүлтүксүз болуп калды.

Мамлекет башчылары дээрлик 5 миллиард долларга жеткен өз ара сооданын көлөмү тездик менен өсүп жатканын канааттануу менен белгилешти. Ири кооперативдик долбоорлор ийгиликтүү ишке ашырылууда.

Аймактык жана эл аралык күн тартиби боюнча пикир алмашып, Борбордук Азиянын туруктуу өнүгүүсүн камсыздоо маселелери талкууланды.

Көп тараптуу түзүмдөрдүн алкагында өз ара пайдалуу кызматташтыкты улантууга чечкиндүү экени баса белгиленди.

Булак: NazarNews.kg