Орусияда тоок этине болгон дүң баалар тез өсүүдө: 2025-жылдын сентябрь айында бройлер тоогунун тушкеси өткөн жылдын ушул мезгилине салыштырмалуу 30%га кымбаттап, килограммы 190 рублга жетти. Бул — жыл башынан берки эң жогорку көрсөткүч, деп маалымдайт «Коммерсант» Улуттук канаттуулар союзуна шилтеме кылып.

Ошондой эле чочконун эти да олуттуу кымбаттады. Улуттук эт кайра иштетүүчүлөр союзу билдиргендей, октябрдын башына карата чочконун бут этинин орточо баасы бир жыл ичинде дээрлик үчтөн бирине (31%) өстү — 259 рублдан 340 рублга чейин. 2025-жылдын башында бул продукттун килограммы орточо 279 рубль турган. Уюмдун жетекчиси Юлия Панферованын айтымында, “чочконун бардык бөлүктөрү кымбаттап жатат”: чочконун кесиндиси 30%га, жакасы (лопаткасы) 13%га кымбаттаган. Ал быйыл чочко эти баасы боюнча эң жогорку өсүштү көрсөткөнүн белгиледи.

Росстаттын маалыматына караганда, уй этине болгон дүң баалар да өсүүдө, бирок жайыраак темп менен. Бир жыл ичинде баа 13,3%га, жыл башынан бери 8,5%га жогорулады. Болжол боюнча, жылдын экинчи жарымында дүң баа дагы 12–15%га чейин өсүшү мүмкүн. 2025-жылдын сентябрь айында сөөксүз эттен башка уй этине болгон орточо чекене баа килограммына 660,19 рублга жеткен. “АБ-Центр” аналитиктери билдиргендей, сентябрдын аягына карата уй эти дүкөндөрдө өткөн жылга салыштырмалуу 15,4%га кымбаттаган.

Консалтинг компаниясы Strategy Partners август айында эле 2025-жылы чекене эт баалары да кескин өсөрүн божомолдогон. Баалоо боюнча, кой эти жана уй этинин чекене баасы жылдын экинчи жарымында 12–15%га кымбатташы мүмкүн. Neo компаниясынын өнүгүү боюнча өнөктөшү Альбина Корягина белгилегендей, кой эти эң тез кымбаттап жаткан продукт: акыркы 18 айда дүкөндөрдө анын баасы 44,7%га өскөн.

Эт продукцияларынын баасынын өсүшү өндүрүүчүлөрдүн чыгымдарынын көбөйүшү жана мурдагы жылдары баанын “кармалганы” менен түшүндүрүлөт, — дейт Strategy Partners компаниясынын өкүлү Артём Суворов. Ал эми «Мираторг» компаниясында билдиришкендей, акыркы жылдары уй жана кой этинин өздүк наркы кеминде 30%га жогорулаган, бул бизнеске инвестиция тартууну чектеп, малдын санынын кыскарышына алып келген.

Булак: "eurasiatoday.ru"