Кыргызстандын сот органдары өзгөчө абал шартында кадимки тартипте иштей берет. Бул тууралуу Жогорку сот кабарлады.

"Бул максатта сот залдарына жараяндын катышуучулары гана киргизилет. Жарандарды кабыл алуу, жолугушуулар жана башка иш-чаралардын баары токтотулат. Соттолуучулардын жакындарын, журналисттерди жана башка угуучуларды киргизүүгө чектөө коюлат", - деп айтылат маалыматта.

Ошондой эле журналисттерге керектүү маалымат соттордун басма сөз кызматтары аркылуу берилип турары айтылды.

Кыргызстанда коронавирустун айынан айрым аймактарда 25-марттан тартып өзгчө абал киргизилип жатат. Президент Сооронбай Жээнбеков Бишкек, Ош жана Жалал-Абад шаарларынын, Ош облусунун Ноокат, Кара-Суу райондорунун, ошондой эле Жалал-Абад облусунун Сузак районунун аймактарына өзгөчө абал киргизүү жөнүндө жарлыктарга 24-мартта кол койду. Ушул эле күнү Жогорку Кеңеш кезексиз жыйынга чогулуп, бул жарлыктарды толук колдоп берди.

Булак: NazarNews.kg