Сауд Арабиясы саламаттык сактоо тармагында ооруларды дарылоого гана эмес, аларды алдын ала аныктап, алдын алууга багытталган жаңы ыкмаларды өнүктүрүп жатат. Бул багытта жасалма интеллект, геномика жана медициналык маалыматтарды алмашуу системалары колдонулууда.

Бул тууралуу Arab News Эр-Риядда өткөн Forbes Middle East Healthcare Leaders Summit иш-чарасында саламаттык сактоо, инвестиция жана фармацевтика тармагынын өкүлдөрү менен болгон талкууларга таянып жазды.

Адистердин айтымында, медициналык маалыматтарды коопсуз жана анонимдүү түрдө бириктирүү оорулардын тобокелдиктерин эрте аныктоого жана алдын алуу чараларын өз убагында көрүүгө мүмкүнчүлүк берет.

Johns Hopkins Aramco Healthcare компаниясынын башкы директору доктор Говард С. Подольский маалыматтарды бөлүшүү жана ар кандай маалымат базаларынын ортосундагы тоскоолдуктарды жоюу калктын ден соолугуна байланыштуу тобокелдиктерди жакшыраак түшүнүүгө шарт түзөрүн белгилеген.

Анын айтымында, маалыматтар анонимдештирилип, корголгон шартта талданса, оорулардын коркунучун алдын ала аныктап, саламаттык сактоону профилактикага көбүрөөк багыттоого болот.

Мындан тышкары, адистер геномиканын маанисине да токтолушкан. Hikma Pharmaceuticals компаниясынын MENA аймагындагы биотехнология боюнча улук директору Самех М. Аззамдын айтымында, медицина бара-бара ооруну пайда болгондон кийин аныктоодон генетикалык мутацияларды жана тукум куучулук тобокелдиктерди эрте изилдөөгө өтүүдө.

Айрыкча рак сыяктуу ооруларда адамдын геномун жана ага айлана-чөйрөнүн таасирин эрте изилдөө келечекте оорунун алдын алууга көбүрөөк мүмкүнчүлүк берери айтылды.

Ошондой эле дарылар рынокко чыккандан кийинки бейтаптардын пикирлерин чогултуу да маанилүү экени белгиленди. Partex AI компаниясынын негиздөөчүсү жана башкы директору Гунджан Бхардвадждын айтымында, телемедицина платформалары аркылуу бейтаптардын дарылоонун натыйжалуулугу тууралуу пикирлерин чогултуу медициналык кызматтарды жана дарылоону жакшыртууга жардам берет.

Адистер Сауд Арабиясында саламаттык сактоонун жаңы моделдерин түзүү үчүн чоң мүмкүнчүлүк бар экенин белгилешти.

Жыйынтыгында, жасалма интеллект, геномика жана маалыматтарды талдоо медицинада ооруну дарылоодон мурда аны алдын алууга багытталган жаңы этапты түзүп жатат.