Социалдык фонддун мурдагы жетекчиси Медер Ирсалиев кызматта турган кезде кайсы бир партия үчүн каражат чогулткан. Бул тууралуу Биринчи май райондук сотунун токтомунда айтылат.

Соттун чечими менен Ирсалиев коррупциялык иштерге аралашуу фактысы (Кылмыш-жаза кодексинин 43-319-беренеси) боюнча күнөөлүү деп табылып, 260 миң сом айыпка жыгылган.

Соттун материалдарында Ирсалиев Соцфонддун аппаратынын А.Б. аттуу жетекчиси менен биргеликте бардык аймактык башкармалыктардан саясий партияга (аталышы айтылган эмес) колдоо көрсөтүү үчүн каражат топтогону айтылат. Анын мындай аракети коомчулук менен мамлекеттин кызыкчылыгына доо кетиргени белгиленди.

2020-жылдагы Жогорку Кеңешке шайлоонун алкагында жүргүзүлгөн үгүт кампаниясы учурунда Соцфонддун А.Б. аттуу аппарат жетекчиси Ирсалиевдин тапшырмасы менен фонддун облустар боюнча координаторлорунун WhatsApp-группасына аудио жөнөткөн. Соттон билдиришкендей, бардык аймактык башкармалыктардан 40 килограмм күрүч, картошка жана төө буурчак чогултуу тапшырылган, бул жашыруун сөз 40 миң сом дегенди туюнткан.

Соттун токтомуна караганда, координаторлор акча топтоп берүүгө аргасыз болушкан. Себеби мындай кылмыштуу ишке барбаса аларга карата чара көрүлөрүн түшүнүп турушкан. Натыйжада 2020-жылдын сентябрынан октябрга чейинки аралыгында 660 миң сом топтолуп, анын 100 миңи саясий партияга колдоо иретинде берилген. Кийин маалым болгондой, шайлоонун жыйынтыгы жокко чыгарылгандан кийин өз каалоолору менен калган 560 миң сомду УКМКнын атайын эсебине которушкан.

Токтомдогу маалыматка караганда, акча Соцфонддун жетекчилигине ар кандай жолдор менен берилген (колуна, банк, таксисттер аркылуу).

Кийин Ирсалиев тергөө менен кызматташууга макул болгон. Ал сотто күнөөсүн толугу менен мойнуна алып, кылмыш иши боюнча кызматташа турганын айтып, башка катышуучулардын бетин ачууга жардам берерин билдирген. Ирсалиев соттон ага айып салууну суранган.

Мамлекеттик айыптоочу мурдагы аткаминер тергөө менен активдүү иштешкенин тастыктап, кызматташуу боюнча келишимдин негизинде ага төртүнчү категориядагы айып салууну (260 миң сом) суранган. Жыйынтыгында сот аталган суммада айып салуу чечимин чыгарган.

Булак: NazarNews.kg