Кадимки алкомагнат Шаршенбек Абдыкеримов саясатка аралашпаганы менен таасири бир топ күчтүү окшобойбу. Өзүнүн амири мененби же акчанын амири мененби социалдык өнүктүрүү министрлигине Таалайкүл Исакунова деген эжекесин алып келип койгон. Министрликке келгенден бери жарытылуу иш кылбаган Исакунова өз каалагандай чартаңдап, өз билгенин кылып жүргөндүгү тууралуу кулагыбыз чалды.

Уккан кулакта жазык жок дегендей ноябрь айларында социалдык өнүктүрүү министрлигине океандын ары жагындагы Америка өлкөсүнөн алакандай тоголок кат келет. Катта АКШнын “жетим балдарды асырап алуу” боюнча бир уюм чоң жыйын өткөрүп жаткандыгы, жана ага катышууга Кыргызстандын социалдык өнүктүрүү министрлигинен 5 адам келип катышуусун өтүнүшөт.

Адатта мындай тышкы өлкөлөрдөн келген сунуштарга өкмөт башчы уруксаат бериши керек эмеспи, Сапар Исаков бул боюнча маалыматты карап чыгып, уюмдун ишмердүүлүгү анчейин эмес экендигинен улам барбайсыңар деп так кесе жооп узаткан. Бирок ээлигип алган Исакунова ноябрдын башында күйөөсү баласын алып АКШны көздөй сапар алат. Ал эми анын артынан эки үч күндөн кийин, социалдык өнүктүрүү министрлигинин төрт кызматкери да учуп барышкан экен.

Кызыгы министрдин үй бүлөөсү АКШнын жанагы уюму каржылаган мейманканда кызматкерлер менен чогуу болуп, Исакунова жыйынга отурбай шаар айланып көрүп жүрүп эле кайра кайтып келишкен.

Айтса айтпаса төгүнбү Исакунованын бул кылыгы өкмөт башчы Сапар Исаковго жетип, Исакунованы чакыртып, арызыңызды жазып бошотуп бериңиз орунду деп сылык узаткан имиш.

Өкмөт башчынын жүзүнө карап өз күнөөсүн моюндаган Исакунова чыгып эле атасына даттангандай Шаршенбек Абдыкеримовго даттанып, эптеп алып калуусун өтүнөт. Эжекесин кыя албаган Абдыкеримов Исаковго чалып ортого түшүп ордунда калып иштеп жаткандагы кербези деп уктук.

Анысы го мейли дечи бирок кооптондурган маселе эгер Исаков барбагыла деп жөнөтпөй жаткан уюмдун жыйынына барган Исакунова кандай максатта, эмне боюнча жыйынга баргандыгын бир кудай менен Исакунова билбесе ким билет.

Экинчиден бизде УКМК деген кызмат, кантип күйөөсү аялынын учуп кетип жатканынан кабар албай калды? Бизге жеткен маалыматтарга таянсак АКШдагы уюм бала асырап алуу боюнча иш алып барат, баягы багаар көрөөрү жок жетим бөбөктөрдү сата турган доорго баш багып жатабы деген суроо туулат.

Албетте жаман айтпай жакшы жок дейт, араңдан зорго тыйылган бала сатуу маселеси кечээ жакында бир кылт этти. Бул маалыматтан кийин тийшелүү органдар териштирсе керек. Же Шакинин шарапаты менен Исакунова Исаковду тоготпой жүрө береби деген жоопсуз суроолорго балким тиешелүү кызматтар чекит коет деп үмүт кылып туралы.

Мамытов Жертыңшаар

Булак: NazarNews.kg