Президенттин Баткен облусундагы ыйгарым укуктуу өкүлү Абдикарим Алимбаев Лейлек районунун Жаштык айылынын эли менен жолугушуп, биргеликте ыйык Рамазан айынын урматына өткөрүлгөн ооз ачууга катышты.

Президенттин аталган облустагы өкүлчүлүгүнүн басма сөз кызматынан билдиришкендей, аталган саамалыкта облус башчысы чек ара аймагынын элинин көйгөйүн жеринде угуп, суроолоруна жооп берди.

Ошондой эле ыйгарым укуктуу өкүл айыл аксакалдары, жергиликтүү тургундар менен биргеликте Рамазан айында өлкөнүн, анын ичинде Баткен облусунун тынчтыгы, өсүп-өнүгүүсү үчүн дуба кылышты.

Белгилей кетсек, облус башчысы Абдикарим Алимбаев 13-апрелде Лейлек районунун Жаңы-Жер айылында түнөп, чек ара аймактарындагы кырдаалды жеке көзөмөлүнө алат.

Эске салсак, 12-апрелде тажик чек арачылары кыргыз чек арачыларынын эскертүүсүнө карабай Кыргызстандын аймагына кирип, жыйынтыгында ок атылган. Бирок эки тараптын Чек ара кызматтарынын өкүлдөрүнүн сүйлөшүүсүнөн кийин атышуу токтотулганы, кырдаал туруктуу экени айтылган. Кийинчерээк кайрадан атышуу болуп, тажик тарап Кыргызстандын Достук айылын миномёт менен аткылай баштаганы кабарланган. Тажик тарап кыргыз айылын миномёт менен атуусун токтоткон соң Баткен районунун Радар-1 жеринде турган Кыргызстандын чек арачыларына ок чыгара баштаган.

13-апрелге караган түнү Лейлек районуна караштуу Кыргыз-Встреч аймагында кыргыз-тажик чек арасындагы абал талкууланып, тараптар чатак чыккан жерден кошумча каражаттарын алып кете баштаган.

Тараптар эки ирет жолугушуу өткөрүп, бир катар макулдашууларга келишкен.

Булак: NazarNews.kg