Кыргыз Республикасынын Жогорку Кеңешинин Төрагасы Талант Мамытов Маалымат жана басма сөз тармагында эмгектенгендерди кесиптик майрамы менен куттуктады.  

Урматтуу журналисттер!

Сиздерди Кыргыз Республикасынын Жогорку Кеңешинин жана жеке өзүмдүн атымдан кесиптик майрамыңыздар - Маалымат жана басма сөз күнү менен чын дилимден куттуктайм!

Дүйнөдө маалымат алмашуу тездик менен өнүгүп жаткан доордо технологиялык жаңылануулардан тышкары, журналисттик адистиктин мааниси жогору экени ачык байкалууда. Айрыкча демократиялык багытты тандаган коом үчүн сөз эркиндигинин жана басма сөз каражаттарындагы ачык-айкындуулуктун баасы өтө жогору экени Кыргызстан эгемендүүлүктү алган алгачкы жылдардан бери таасын далилденип келет. Анткени басма сөз каражаттары элге маалымат жеткирүү менен гана чектелбей, коомдук аң-сезимдин калыптанышына түздөн-түз таасир этип, жарандык коом менен бийлик ортосундагы байланышты камсыздап турат.

Ардактуу журналисттер!

Сиздер өлкөдөгү жаңылануулардын башатында туруп, мамлекет тарыхындагы урунттуу учурларга, тарыхый бурулуштарга, экономикалык жана социалдык жактан жасалган кадамдарга өзгөчө салымыңыздарды кошуп келесиздер. Мындан ары да коомдун күзгүсү, жакшылыктын жана чындыктын жарчысы болууну улантасыздар деген ишенимдебиз. Ошондой эле акыркы окуяларга байланыштуу өлкөнү жакшы жакка өзгөртүү багытында жүрүп жаткан реформалардын баарын ырааттуу чагылдыруу аркылуу мамлекеттик бийлик бутактары, анын ичинде кыргыз парламенти менен жалпы коомчулуктун өз ара байланышын дагы да чыңай бересиздер деген үмүттөбүз.

Урматтуу басма сөз кызматкерлери!

Дагы бир жолу кесиптик майрамыңыздар менен куттуктап, ар бириңизге бекем ден соолук, үй-бүлөңүздөргө бакыт-таалай каалаймын! Татаал жана сыймыктуу болгон ардактуу ишиңиздерди ийгиликтер коштосун! Сөз эркиндигин тутунган өлкөбүздө тынчтык, элибизде ынтымак, биримдик болсун!

 Булак: NazarNews.kg