“Талибан”* Анкарадан Афганистандын борборундагы аэропортту башкарууну өз колуна алууну суранды”, - деп билдирди Түркиянын президенти Режеп Тайип Эрдоган.

"Алар коопсуздук үчүн өздөрү жооп беришерин, көзөмөлдү биз жүргүзөрүбүздү айтышты. Бирок биз азырынча бул темада чечим кабыл ала элекпиз. Эми биздин артыкчылык - жарандарыбызды жана аскерлерибизди ал жерден эвакуациялоо.

Азыр биз ал жактагы кырдаалды талдашыбыз керек. Анткени, Ооганстанда ушул тапта башкаруучу жок. Биз бул маселени дагы карап чыгабыз", - деди Эрдоган.

Афганистандагы бийлик алмашуу

Афганистандан америкалык аскер күчтөр чыгарылып жатканда "Талибан"* кыймылынын согушкерлери чабуулга өтүшкөн. Өлкөдөгү бир катар ири шаарларды басып алып, 20 жылга созулган согуш аяктаганын жар салган. Азыр мамлекетте башкаруунун кандай формасы болору талкууланып жаткан маал. Жаңы бийликке жакын маалымат булактардын РИА Новостиге билдиргенине караганда, бийликти 12 кишиден турган кеңеш башкарат.

Ал эми атасы Ахмад Шах Масуд мындан 20 жыл мурда террорчулардын колунан набыт болгон Ахмад Масуддун аскерлери жайгашкан Панжшер провинциясы талибдерге каршылык көрсөткөн жападан жалгыз очок болуп калууда.

Талибдер Афганистандын арбын бөлүгүн ээлегенден кийин АКШ аскерлеринин кайтаруусундагы Кабул аэропорту аркылуу чет элдиктер жана аларга көмөкчү болгон жергиликтүү тургундар да эвакуацияланып жаткан.

* – Кыргызстанда жана башка мамлекеттерде тыюу салынган террордук уюм.

Булак: NazarNews.kg