Бүгүн, 4-июнда Тажикстандын Тышкы иштер министрлиги Кыргызстандын Тажикстандагы элчисине нота тапшырды. Ага келишимдерди кыргыз тарап бузганы негиз болгонун министрлик «Азия-Плюс» басылмасына билдирген.

«Тажикстандын чек арачылары Тажикстандын аймагында, эки өлкөнүн биргелешкен протоколунда макулдашылган жана белгиленген жерде турат», - деп айтылат маалыматта.

Буга чейин Кыргызстандын Тышкы иштер министрлиги Тажикстандын элчисине нота тапшырган. Бул кыргыз-тажик мамлекеттик чек арасындагы — Ош облусунун Чоң-Алай районундагы чек арадагы тактала элек аймакка Тажикстан аскер кызматкерлерин киргизгени менен байланыштуу.

Эки тараптын келишими бар болгонуна карабастан Тажикстандын чек арачыларынын өкүлдөрү байланышка чыкпай жатканы да айтылды.

Кыргызстан тарап эки өлкөнүн чек ара аймагындагы жаңжалга жол бербөө үчүн Тажикстан тараптан Унжу-Булак аймагына орнотулган контейнерлерди бузуу, аскер кызматкерлери менен техникаларын чыгарып кетүүнү талап кылган.

Кыргыз-тажик мамлекеттик чек арасындагы абал чыңалган бойдон турганын бүгүн, 4-июнда эртең менен Кыргызстандын УКМКнын Чек ара кызматынын басма сөз кызматы билдирди.

«Тажик тарап кыргыз-тажик мамлекеттик чек арасын делимитациялоо жана демаркациялоо боюнча өкмөттөр аралык делегациянын буга чейин жүргүзгөн келишимдерин бузуп, 4-июнда саат 03:00 чамасында Ош облусунун Чоң-Алай районундагы Унжу-Булак аймагындагы такталбаган чек ара аймагында контейнерлерди орното баштаган», - деп айтылат расмий маалыматта.

Чек ара кызматынын маалыматы боюнча, тажик тараптан автомобилдер жана жеңил брондолгон техникаларда аскер кызматкерлери чогулуп жатканы байкалууда.

Источник: NazarNews.kg