Кыргызстандагы чет өлкөлүк жана жергиликтүү ЖМК өкүлдөрү, министрлер кабинетинин мүчөлөрү Баткен облусунда жүрүшөт. Алар облустун жабыркаган айылдарын кыдырат.

Башкы максат – чек арага чектеш айылдарга баскынчылык менен кирип келип, жай тургундардын, социалдык объектилерди талкалашканын көрсөтүү жана ал аркылуу дүйнө коомчулугуна чындыкты жеткирүү.

ӨКМдин болжолдуу алдын ала маалыматына караганда, Тажикстандын куралдуу кол салуусунан улам Баткен облусунда талкаланган турак үйлөрдүн саны 432ге жетти. Ошондой эле комиссия 285 короо-жайлар, мал сарайлар жана чарбалык объектилер, алты мектеп, алты бала бакча, эки саламаттык сактоо уюму, тогуз административдик имарат, 26 автоунаа жана башка турмуш-тиричиликти камсыз кылуучу 171 объект талкаланганын аныктады.

Эске сала кетсек, үстүбүздөгү жылдын 14-17-сентябрында Тажикстан куралдуу агрессия көрсөтүп, мурда сүйлөшүлгөн бардык макулдашууларга карабай, кыргыз-тажик мамлекеттик чек арасынын бардык периметри боюнча, тактап айтканда, Баткен облусундагы жана Ош облусунун Чоң-Алай районундагы чек аралык жана жарандык объекттерге чабуул жасады.

140 миңге жакын кыргызстандык чек арага жакын калктуу конуштардан эвакуацияланды.

Саламаттык сактоо министрлигинин маалыматына караганда, куралдуу кагылыштан 59 кыргызстандык (аскер кызматкерлери жана жай тургундар) каза болуп, 198 киши жабыркады.

Ак-Сай айылы

Интернационал айылы