Россиянын тышкы иштер министри Сергей Лавров афган качкындарына баш паанек берүү боюнча Батыштын позициясын сындагандыгын РИА Новости "Россия 24" телеканалына шилтеме кылып жазды.

"Батыш коңшу мамлекеттерибизди бир нече миңдеген качкындарды кабыл алууну, ал убактылуу, Батыш башка батыш мамлекеттерине иммиграциялоо үчүн зарыл болгон документтерди иретке келтирип алгыча деп суранып баштады", — деди Лавров.

Ал азырынча Борбор Азия мамлекеттеринин ичинен эч ким бул жол менен кетпегендигин, жок дегенде батыш өлкөлөрү айтып жаткан масштабда эместигин айткан.

"Албетте, жайгашып калгандардын тагдырын чечиш керек. Батыш аларга бул адамдардын документтерин иретке келтирип алгыча, "эки-үч ай керек" деген нерсени, коалиция менен кызматташкандыктан ал кишилерди сактап калыш зарылдыгын айтып жатат. Эгерде афган жеринде жүрүп узак убакыт бою кызматташса, аларды котормочу, маалымдагыч кылып алып жатканда таржымалын текшерсеңер керек да. Силер менен иштешсе, бирок алигүнчө аларга ишенериңерди же ишенбесиңерди билбесеңер, анда эмне үчүн биздин союздаш болгон Борбор Азия мамлекеттеринин башына жүктү үйүп жатасыңар", — деп собол узаткан Лавров.

Август айынын башында "Талибан"* кыймылы Афганистандын аскер күчтөрүнө чабуулун активдештирип, 15-августта Кабулду басып алган. Анын эртеси эле согуш токтогонун жар салышкан. Августтун акыркы эки жумасы америкалык аскерлердин көзөмөлүндө болгон Кабул аэропортунан Батыштын жарандары жана алар менен кызматташкан афгандар массалык түрдө эвакуацияланган. 31-августка караган түнү дээрлик 20 жылга жакын Афганистанда болгон АКШ аскерлерин Кабул аэропортунан чыгарып кетишкен.

Сентябрдын башында Афганистандын убактылуу өкмөтүнүн курамы жарыяланып, аны Мохаммад Хасан Ахунд жетектеген. Ал талибдердин биринчи жолу бийликтеги учурунда тышкы иштер министри болуп иштеп, 2001-жылдан бери Бириккен Улуттур Уюмунун санкцияларында болуп келген.

* — Кыргызстан, Россия жана башка бир катар өлкөлөрдө тыюу салынган уюм

Булак: NazarNews.kg