НАТОнун көпчүлүк өнөктөштөрү Вашингтонго Иран менен согушка катышууну же Ормуз кысыгында коопсуздукту камсыз кылууну көздөбөй турганын билдиришкен. Бул тууралуу АКШнын президенти Дональд Трамп 17-мартта TruthSocial социалдык медиа тармагына жазган.

Трамп буга таң калбаганын, анткени ал ар дайым НАТО АКШга жардам бербейт деп ишенип келгенин билдирди:

"Биз бул өлкөлөрдү коргоого жылына жүздөгөн миллиарддаган долларларды коротобуз, ал эми алар биз үчүн эч нерсе жасашпайт.

"Жакынкы Чыгыштагы аскердик ийгиликтерибиздин аркасында бизге НАТО өлкөлөрүнүн жардамына "муктаждык" же каалоо жок!" — деп жазган ал.

Трамп өзүнүн билдирүүсүндө АКШ "эч кимдин жардамына муктаж эмес" деп кошумчалаган.

«Reuters» агенттиги жазгандай, Трамп Ак үйдө Ирландиянын премьер-министри Михол Мартин менен жолугушуу учурунда НАТО өлкөлөрүнүн чечимин акылсыздык деп атады.

"Баары биз менен макул, бирок эч ким жардам бергиси келбейт. Биз муну эстеп калышыбыз керек", - деди ал.

Буга чейин Трамп АКШ НАТОдон чыгарын айткан, бирок 17-марттагы билдирүүлөрүндө бул маселени көтөргөн жок.

Дональд Трамп 15-мартта союздаштарды АКШга жардам берүүгө жана дүйнөлүк мунай заттын 20% өткөн Ормуз кысыгындагы коопсуздукту камсыз кылууга чакырган. Ирандын чабуулдарынан улам кысык аркылуу жүк ташуу дээрлик токтоп калган. Бирок Германия жана Улуу Британия кысыкты ачуу үчүн кемелерин жөнөтпөй тургандыгын билдиришкен.