Түрмөдө каза болгон укук коргоочу Азимжан Аскаровдун өлүмүнө дем алуунун жетишпестиги (острая дыхательная недостаточность) себеп болгон. Бул тууралуу өлүктү союудан кийинки медициналык корутундуда айтылганын анын жакындары билдирген.

Алардын айтымында, документте эки тараптуу пневмониянын фонунда курч респиратордук жетишпестик жаралгандыгы көрсөтүлгөн.

Белгиленгендей, Аскаровдун сөөгү Бишкектин өлүкканасында болгон жана 27-июлда анын сөөгү туугандарына өткөрүлүп берилген.

Жаза аткаруу мамлекеттик кызматы белгилегендей, эгерде адам экстремизм же терроризм үчүн соттолгон болсо, анын сөөгү өткөрүлүп берилбейт. Башка учурларда, сөөктөр ар дайым туугандарына берилет.

Адвокат Валериан Вахитов  журналисттерге билдиргендей, учурда Азимжан Аскаровдун сөөгүн Өзбекстанга өткөрүп берүү маселеси чечилип жатат.

"Өзбек бийлиги Аскаровдун сөөгүн алардын аймагына алып келүүгө уруксат береби же жокпу азырынча билбейбиз. Расмий жоопту күтүп жатабыз. Анын туугандары аны Кыргызстанда жерге берүүдөн - вандализмден коркушууда", - деп түшүндүрдү Вахитов. Өзбекстан макулдугун бере электигине байланыштуу азыркы учурда сөөк Бишкектеги өлүкканада сакталып тургандыгын жакындары маалымдашты. 

Эске сала кетсек, Азимжан Аскаров Жалал-Абад облусунун Базар-Коргон районунда жашаган жана адам укуктары менен алектенген. 2010-жылдагы июнь окуясынан кийин ал башаламандыкты уюштурган жана милиция кызматкеринин өлүмүнө катышкан деген шек менен кармалган. Бардык инстанциялардагы соттордун чечими боюнча ал 2010-жылдын июнь окуяларында башаламандык уюштурган деген айып менен өмүр бою эркинен ажыратылган.

2016-жылы апрелде БУУнун Адам укуктары боюнча комитети кыргыз бийлигин укук коргоочунун ишин кароого чакырган. Кийинчерээк бул иш Чүй облустук соту тарабынан каралып, 2017-жылдын 24-январындагы чечим менен өмүр бою абак жазасына кесилген.

2020-жылы 13-майда Кыргызстандын Жогорку Сотунда адвокаттардын кассациялык даттануусу боюнча укук коргоочу Азимжан Аскаровдун иши боюнча соттук отурум болуп өттү.

Кеңешме бөлмөсүнөн кайтып келген Жогорку Соттун сот коллегиясы төмөнкү инстанциялардын өкүмүн күчүндө калтырган.

Аскаровдун өзү ага коюлган күнөөлөрдү мойнуна алган эмес. 

Ал үстүбүздөгү жылдын 25-июлунда каза болгон. 

Аскаровдун үч уулу жана бир кызы Өзбекстандын Ташкент облусунда жашайт.

Булак: NazarNews.kg