УКМК: Болот Сүйүмбаевге издөө жарыяланды

Журналист: МЭЭРИМАЙ АЛЫБЕКОВА

11.12.2020, 14:45

22700

кылмыш жана кырсык

УКМКнын төрагасынын мурдагы орун басары Болот Сүйүмбаевге издөө жарыяланды. Бул тууралуу кечээ, 10-декабрда УКМКнын басма сөз кызматы билдирди.

Маалыматка ылайык, алтын-зер буюмдарынын аткезчилигине байланыштуу ачылган сотко чейинки өндүрүштүн алкагында УКМКнын төрагасынын мурдагы орун басары Болот Сүйүмбаевдин бул кылмышка тиешеси бар экендиги жөнүндө айныгыс далилдер алынды. Ал суракка бир нече жолу чакырылган. Бирок келген эмес.

УКМК Жазык кодексинин 320-беренеси (“Кызмат абалынан кыянаттык менен пайдалануу”) жана 223-беренеси (“Экономикалык контрабанда”) боюнча шектелип жатканы тууралуу Болот Сүйүмбаевдин сыртынан кабарлама таратылды жана издөө жарыяланды.

Белгилей кетсек, буга чейин алтын аткезчилиги боюнча кылмыш иши козголуп, УКМКнын Коррупцияга каршы күрөшүү кызматынын мурдагы кызматкери кармалган. Мындан тышкары, УКМКнын төрагасынын мурдагы орун басары Дүйшөнбек Чоткараев күбө катары суракка алынды.

Эске салсак, 2019-жылдын март айынан баштап, КРнын Аскер прокуратурасы тарабынан КРнын Улуттук коопсуздук мамлекеттик комитетинин кызматкерлери менен жең учунан сүйлөшүп алып, айрым жеткирип берүүчүлөр тарабынан зер буюмдардын өзгөчө ири өлчөмдө аткезчилик жол менен ташылып кетишине байланыштуу бир нече кылмыш иши боюнча сотко чейинки өндүрүш башталган.

Булак: NazarNews.kg