Казакстандык вайнер жана актер Мейржан Туребаев финансы пирамидасын түздү деп шектелип жатат. Бул туурасында Sputnik Казакстан жазды.

Белгилей кетсек, Туребаев "Патруль" сериалына тартылып жана аялы экөө үй-бүлөлүк жашоо боюнча кыска роликтерди жаратып келишкен.

Финансы пирамидасы боюнча иште сот Алматыдагы үч адамдын баш коргоо чарасын өзгөртүп, экөөнү күрөө менен үйүнө кое берген.

Бул маалыматты Алматы шаардык соту тастыктады.

"Сотко чейинки иликтөө органынын Т. жана Ш. аттуу жарандарга бир айлык эсептик көрсөткүчтүн 1000 көлөмүндө (3 миллион теңге же 7 миң доллардан көбүрөөк сумма) күрөө менен чыгарып, баш коргоо чарасын өзгөртүүгө уруксат берүү сунуштамасы тергөө сотунун токтому менен канааттандырылган", — деп билдиришкен соттон.

Үчүнчү шектүүгө карата баш коргоо чарасы боюнча сунуштама сыртынан канааттандырылган.

"С. аттуу жаранга карата анын жоктугунан улам баш коргоо чарасы өзгөртүлүп, сыртынан эки айга камакка алынган", — деп кошумчалашкан.

Бул адамдар Казакстандын Кылмыш кодексинин 217-беренесинин 3-пункту ("Башка бирөөнүн ири көлөмдөгү акчасын же мүлкүн алып финансылык (инвестициялык) пирамида түзүп жана ага жетекчилик кылган") менен шектелип жатат.

Алматынын Полиция департаментинин маалымат кызматынан тартип сакчылары үчүнчү шектүүнү издеп жаткандыктарын айтышты.

"Анткен менен С. аттуу жарандын кайда экендиги такталып, издөө иштери жүрүп жатат", — деп билдирген аталган департаменттин жетекчисинин орун басары Рустам Абдрахманов.

Полициядан кылмыш иш ASTEX.KZ, ACD technology компанияларынын жетекчилеринин үстүнөн финансылык пирамиданы түзүп жана аны башкарып турган фактылар боюнча жарандардын жамаатташып жазган арыздарынын негизинде катталгандыгын айтышты.

Журналист Козачков Telegram каналында бүгүн сот вайнерлер – Мейржан Туребаев , Азизжан Саидбаев жана Меийрхан Шерниязов боюнча баш коргоо чарасын өзгөртүү боюнча чечим кабыл алынгандыгын жазган. Журналист тергөөнүн билдиргенине таянып, алар Mudarabah capital финансылык пирамидасын жарнамалап гана эмес, компаниянын түзүүчүлөрү катары кирешени үзгүлтүксүз алып тургандыгын кабарлаган.

Эске салсак, 2021-жылдын октябрь айында Mudarabah capital компаниясынын ээси Алматыда финансылык пирамиданы уюштурду деген шек менен кармалган. Финансы пирамидасын түзгөнү боюнча кылмыш иши ачылып, тергөө жүрүп жаткан компаниянын жарнама ролигине казакстандык вайнерлер тартылган.

Булак: NazarNews.kg