Тарыхчы жана коомдук ишмер Табылды Акеров байыркы кыргыздардын тарыхын изилдеп, Кыргызстандын азыркы аймагында биздин заманга чейин жана биздин замандын башында жашаган усундар кыргыз болгон деген жыйынтыкка келген. Барсбек-кагандын доорунда түргөштөр менен кыргыздар тыгыз байланышта болуп, Көк-түрк каганатына чогуу каршы чыккан.

Түргөш каганатын 704-жылы Үчэлиг-каган негиздеген, ал өлгөндөн кийин сары-түргөштөрдү анын улуу уулу Сакал-хан бийлеп калат, Үчэлигдин кичүү уулу Чженбек кара-түргөштөрдү жетектеп, көк-түрктөргө өтүп кетет, бирок алар менен тил табыша албай, кайра кайтып, Барсбек-каганды колдоп калат.

Кийин, 711-жылы, көк-түрктөр Барсбекти талкалаганда, аны менен кошо Чженбектин да башын алган. Кыргыздар Алтын-көлдө Барсбекке да, Чженбекке дагы рун ташын койгон жана Чженбектин ташында: «Мен, Чженбек, түргөшмүн, азгине уруусунанмын», –деп жазылган. Виктор Бутанаев – «азгине», «эзгене» деген уруу азыркы кыргыздардын арасындагы адыгине эле болуш керек деп чечмелеген.