Эверестке чыккан Эдуард Кубатов Жер шарынын эң бийик чокусунда туруп кыргызстандыктарга кайрылган видеосу менен бөлүштү.

Альпинист Facebook баракчасына жарыялаган видеосунда жеңишин кыргыз элине арнай турганын айткан.

«Кыргыз элим, бүгүн, 23-майда, 8 саат 35 мүнөттө Эвересттин чокусуна чыктым. Кыргыз элим, касиеттүү менин мекеним, ушул жеңишимди силерге арнайм. Эркиндигибизди, касиетүү жерибизди, эгемендүүлүгүбүздү сактап калалы», — деген ал.

Кыргызстандык Эдуард Кубатов 23-май күнү «Эверест 1» экспедициясынын курамында Эверестти багындырган.

Бийиктикке чыгуу 12-апрелде Непалда башталган. Команданын курамына Израиль, Кыргызстан, Малайзия, Россия жана Өзбекстандан барган альпинисттер кирген.

Эдуард Кубатов Жердин эң бийик чокусун багындырган экинчи кыргызстандык болуп калды. Биринчи болуп чокуга 1997-жылы Дмитрий Греков чыккан.

Деңиз деңгээлинен 8 848 метр бийиктикте жайгашкан Тибет менен Непалдын чегиндеги бул чокуну багындырам деп жыл сайын дүйнөнүн ар бурчунан жүздөгөн альпинист келет.

Булак: NazarNews.kg