Урматтуу окурмандар сиздердин алдыңыздарга “NazarNews.kg”маалымат сайты буга чейин дагы уурдалган жана плагиатор ырчыларды ачыкка чыгарып келгенбиз. Мындан ары да “Уурдалган ырлар же плагиатор ырчылар...” аттуу рубрикабызды тартуулай бермекчибиз. Бул рубрикадан сиздер кыргыз ырчыларынын чет элдик ырчылардын ырларын уурдап же плагиаттык кылып ырларды аткарып жүргөндөрүн жарыя кылабыз.

Кыргыз шоу-бизнесинде ырчылар көбөйдү. Бул жакшы нерсе. Бирок алардын арасында таланты бар таанышы жоктор четке сүрүлүп калып кетсе, кээ бир үнүн уксак коркуп кете турган ырчылар, компьютердин жардамы менен жылдыз болуп жүргөндөр да жок эмес.

Акыркы жылдары коёндой окшош ырлар көп жарала баштады. Бирок, азыр ырчысы, аранжировщиги деле ильхомго карап, эмгектенбей эле даяр ырларды уурдап, хит кылып, авторлору менен иши жок которуп ырдап жүргөндөр көбөйдү. Канткен күндө да айрым ырчылар музыкалык форма, натуралдык үндүн жана музыкалык акустиканын эрежелерин сактап жүрүшсө жакшы болмок.

Бүгүнкү биздин каарманыбыз жылдыздуу ырчы мырза Нурмат Садыров жана анын аткаруусундагы “Торгоюм” аттуу ыр. Бул чыгарманы узак убакыт бою маркум Гүлзат Батырканова аткарып, калың элге татыктуу жеткизген. Ырдын авторлору- Рыскулбек Турсуналиев жана Советбек Урматбеков. Ал эми эски чыгарманы 2015-жылдын күз айларында Нурмат жаңы көйнөк кийгизип ырдап чыккан. Айтмакчы, бул ыр Нурматты чоң аренага жарк эте жылдызын жандыра алды. Себеби, ырчы мырза бул чыгарманын аркасы менен бүгүнкү күндө бир дагы тойдон калбай, элге кызмат кылып чөнтөгүн кампайтууда. Бирок, Нурмат бул ырды жарыкка чыгаар алдында өзү эч кандай эмгек коротпой, идея издеп кыйналбай казак элинен даяр ырды уурдап, анын стилине салып ырдап чыккан. Ал казак элинин кайсы чыгармасы экени сиздерге кызыкпы? Анда, аны биз айтабыз!

Нурмат Казакстандын популярдуу ырчы мырзасы Ернар Айдардын 2013-жылы аткарып чыккан “Не дейсиң” аттуу ырын уурдаган. Ернар, бул чыгарманы убагында хит кылып, азыркы тапта өз элинде аткарып жүрөт. “Не дейсиң” аттуу ырдын автору- Бауржан Есебаев. Буга далил төмөндө сиздерге сунуштай турган видео материалдарыбыз бар. Эки аткаруучуну тыңдап, өз пикириңиздерди калтырыңыздар!

Аруужан Булекбаева, NazarNews.kg