Кашкадарыя облусунун Гузар районундагы Uzbekistan GTL заводунда чыккан өрттөн эки жумушчу катуу күйүк алып, ооруканага жеткирилди.

Заводдун аты-жөнүн айткысы келбеген жумушчуларынын бири кырсык 18-июнда болгонун билдирди.

"Жаңы заводдо мындай кырсык боло элек болчу. Аба бөлүштүрүү жабдуусунда жарылуу болуп, өрт чыкты. Эки киши катуу күйүк алып, ооруканага жеткирилди. Көптөгөн өрт өчүрүү унаалары келди. Жетекчилик бул тууралуу эч кимге айтпагыла деп катуу эскертүүдө", – деди жумушчу.

Заводдун аты-жөнүн билдирбөөнү өтүнгөн дагы бир жумушчусу да бул маалыматты ырастады.

Өзбек басылмалары заводдогу кырсык тууралуу эч нерсе жазышкан жок. Маалымат социалдык түйүндөрдө тарагандан кийин "Uzbekistan GTL Узбекистон ГТЛ" компаниясынын өндүрүш башкармалыгынын жетекчиси кырсык боюнча комментарий берди.

"18-июнь күнү саат 20:30да GTL заводундагы абаны бөлүштүрүү жабдуусун ишке киргизүү учурунда кычкылтекти башкаруу клапанынан суюк кычкылтекти сактоо түзүмүнө жогорку жыштыктагы (99,99%) кычкылтек чыгып, от тутанган. Өрт 10 мүнөттүн ичинде өчүрүлүп, завод жумушчуларынын эч кимиси жараат алган жок", – деди Закиржанов.

Жергиликтүү оорукананын аты-жөнүн айтуудан баш тарткан дарыгери бейтаптардын биринин абалы оор экенин билдирди: "Анын бети, колдору жана курсагы катуу күйгөн. Азыр биз дарылап жатабыз. Абалы орто оор болуп турат".

Дагы бир дарыгер экинчи бейтаптын денесинин жарымынан көбү күйүп калганын айтты: "Биздин ооруканада күйүк алган бейтаптарды дарылоо үчүн атайын дарыгерлер жок. Ошондуктан бейтаптын жакындарына Ташкенттен же Самарканддан тиешелүү адис табуу сунушталат".

20-июнь күнү кечинде Nasafnews басылмасы "Өзбекнефтегаз" менен Uzbekistan GTL коомчулуктан заводдун жумушчулары алган күйүк тууралуу маалыматты жашырып жатканын жазды.

Uzbekistan GTL заводу өткөн жылы 25-декабрда ишке кирип, анын ачылышына президент Шавкат Мирзиёев жеке өзү катышкан. Ал жылына 3,6 миллиард куб метр газды кайра иштетип, 1,5 миллион тонна мунай продуктуларын өндүрөт.

Булак: NazarNews.kg