Жашы жете элек кызды зордуктап, өлтүрүүгө шектүү кармалды

Журналист: АЙСУЛУУ ТАЛАНТ

30.09.2025, 11:34

13927

кылмыш жана кырсык

Жаш кызды мыкаачылык менен өлтүрүүгө шектүү жаран кармалды. Бул тууралуу Ысык-Көл ОИИБи билдирди.

Маалыматка ылайык, 2025-жылдын 27-сентябрында Жети-Өгүз райондук ички иштер бөлүмүнө Барскоон айылынын тургуну Т.А. жана Тоң районунун тургуну К.Н. арыз менен кайрылышып, 2008-жылы туулган М.А. Каракол шаарындагы курбусуна чыгып, ошол бойдон үйүнө кайтып келбегендигин билдиришкен.

Арыз Жети-Өгүз РИИБдин МЭЖне катталып, тергөөгө чейинки текшерүү жана издөө иштерине алынган.

Ыкчам аракеттердин натыйжасында шектүү Бишкек шаарында,Ички иштер министрлигинин кылмыш иликтөө башкы башкармалыгы жана Ысык-Көл ОИИБдин кызматкерлери тарабынан кармалган. Ал 1984-жылы туулган, Бишкек шаарынын тургуну А.К. экени такталган.

Алдын ала сурак маалында шектүү А.К. 27-сентябрда жашы жете элек М.Аны күч колдонуп зордуктап, мыкаачылык менен өлтүргөнүн жана анын жансыз денесин Чүй облусунун Кемин районунун аймагына таштап кеткенин мойнуна алган.

Факт Жети-Өгүз РИИБдин КБРне катталып, Кыргыз Республикасынын Кылмыш-жаза кодексинин 122-беренеси (Адам өлтүрүү) боюнча кылмыш иши козголгон.

Шектүү А.К. 2025-жылдын 30-сентябрында Жети-Өгүз РИИБдин убактылуу кармоочу жайына камакка алынган.

Азыркы учурда ар тараптуу жана толук кандуу тергөө амалдары жүргүзүлүп жатат жана тийиштүү экспертизалар дайындалды.