Техаста жолго ташталган жүк ташуучу унаада каза болгон мигранттардын саны 53кө жетти. Фуранын айдоочусу менен шериги өлүм жазасына тартылышы мүмкүн. Бул тууралуу АКШнын Юстиция министрлиги билдирди.

Фура Техастагы ири трассага алып барчу жолдон табылган. Анын ичинде 46 кишинин сөөгү болгон, тирүү калган 16 адам (төртөө жашы жете элек бала) ооруканага жеткирилген. Кийин дагы жети кишини өлгөнү дайын болду.

Автоунаада суу да, кондиционер да болгон эмес. Мигранттар ысык өтүп каза болгон.

Транспорттун айдоочусу Омеро Заморано, ал эми шериги Кристиан Мартинес экени аныкталды. Бул иш боюнча дагы эки адам шектүү катары каралууда. Алардын ар бири 10 жылдан эркинен ажырашы мүмкүн.

"Заморано чет элдиктерди мыйзамсыз ташып, алардын өлүмүнө себепкер болду деп айыпталып жатат. Ал Браунсвиллде төрөлүп, Пасадинада (Техас штаты) жашайт. Заморанонун күнөөсү далилденсе өмүр бою эркинен ажыратылат же өлүм жазасына тартылат. Федералдык округдук сот мыйзам менен бекитилген жагдайларды карап чыккандан кийин тийиштүү чечим чыгарат", —деп айтылат маалыматта.

Документке ылайык, Кристиан Мартинес "мигранттарды мыйзамсыз ташууга катышкан" деп айыпталып жатат.

"Эгер Мартинес күнөөлүү деп табылса, ал дагы өмүр бою эркинен ажыратылып же өлүм жазасына тартылат", — деп айтылат министрликтин релизинде.

Мындан тышкары, куралды мыйзамсыз сактоо беренеси боюнча Мексиканын Хуан Мендес жана Хуан Бильбао аттуу жарандарына айып тагылды. Укук коргоочулардын маалыматына караганда, мигранттар каза болгон фуранын чиркегичи ушул адамдарга катталган. Алар 10 жылга чейин эркинен ажыратылышы мүмкүн.

Техастын губернатору Грегг Эбботт окуяга АКШнын президенти Жо Байденди күнөөлөп жатат. Анын пикири боюнча, миграциялык саясаттын жумшартылганы ушундай кесепеттерге алып келүүдө.

Буга чейин Мексиканын президенти Андрес Мануэль Лопес Обрадор мындай окуялар Мексика-Америка чек арасындагы көзөмөлдүн жоктугунан жана адам сатуу гүлдөп жатканына байланыштуу болуп жатканын билдирген.

Латын Америкадан АКШга агылган мигранттардын саны максималдуу көрсөткүчкө жетти. Буга пандемиянын кесепетинен пайда болгон экономикалык каатчылык себеп болууда. Мексиканын бийлиги 2021-жылы 114 миң мыйзамсыз саякатчыны депортациялаган. Соңку тогуз ай ичинде АКШнын бийлиги Мексика менен чектешкен жерден миллиондон ашык адамды кармаган.

Булак: NazarNews.kg