Бүгүн, 18-март күнү Жогорку кеңештин депутаты Алиярбек Абжалиев жакын таанышы да 12-мартта Умрадан келип, көп адам менен учурашканын парламенттин жыйынында билдирди.

Анын билдиргенине караганда, анын таанышын 17-март күнү гана карантинге алышкан. "Менин жакын таанышым Умрага барып 12-мартта келген. Азыр телефон чалып сүйлөшсөм "үйүмө бүт баары келишкен, учурашышкан" деп айтты. Кечээ кечинде аны "Ак-Кемеге" алып барып жаткызышыптыр. Азыр баары аралашып кетти. Европада ушинтип тоготпой жатып азыр коркунучтуу аймак болуп калды. Бизде дагы ошондой тоготпогондой мамиле болуп жатат. Ушул боюнча жакшылап карабасак болбойт", — деди Абжалиев.

Эске сала кетсек, бүгүн 18-мартта Кыргызстандын аймагында коронавирустун биринчи учуру катталды. Анда 13-март күнү Умра сапарынан келген 3 жаранда коронавируска шек жаралып, дене табы түшпөй жаткан. Тесттин жыйынтыгында алардын коронавирус жуктурганы аныкталды. Учурда алар Жалал-Абад облустук ооруканасында жатышат.

Булак: NazarNews.kg