Республикалык клиникалык жугуштуу оорулар ооруканасында 5 жаштагы бала каза болду. Бул тууралуу Саламаттык сактоо министрлигинин басма сөз кызматы билдирди.

Маалыматка ылайык, 2017-жылы туулган А.А. 23-август күнү саат 21:17 чамасында Токмоктогу ооруканадан Бишкек шаарына жеткирилген.

«Бала профилактикалык эмдөөлөрдү төрөт үйүндө гана алган, ата-энеси башка вакциналардан баш тартышкан. Апасы билдиргендей, 10 күн мурун бала сол буту менен мык басып алган. Кийин дене табы көтөрүлүп, жутуу кыйындаган.

Республикалык клиникалык ооруканага селейме диагнозу менен жеткирилген. Анын абалы өтө оор болчу. Жүргүзүлгөн дарылоо жана Тез жардам көрсөтүлгөнүнө карабастан, бала каза болгон», — деп билдиришти министрликтин басма сөз кызматынан.

Булаку: NazarNews.kg