110дон ашуун өкмөттүк эмес жана укук коргоо уюмдары палестиналыктарды Газадан көчүрүү боюнча сунуштарга каршы чыгышты. Бул тууралуу катардык Al Jazeera телеканалы алардын биргелешкен билдирүүсүнө шилтеме берип маалымдады.

Маалыматка ылайык, америкалык кайрымдуулук, укук коргоо жана диний уюмдар, ошондой эле айрым палестиналык гуманитардык коомдор "палестиналыктарды Газадан күч менен көчүрүү чакырыктарына каршы" экенин билдиришти. "Күч менен көчүрүү адамдарды түбөлүккө жеринен сүрүп чыгаруу ниети менен жасалган учурда этностук тазалоо болуп эсептелет. Америка Кошмо Штаттары палестин элин Газадан чыгып кетүүгө мажбурлап, башка өлкөлөрдү мындай көчүрүүгө катышууга буйрук берүүгө укугу жок", - деп айтылат документте.

Билдирүүдө Израилдин коргонуу армиясы жана израилдик конуш ээлеринин Иордан дарыясынын батыш жээгиндеги аракеттери боюнча "укук коргоо жана кайрымдуулук уюмдарынын терең тынчсыздануусу" да белгиленген. "Бул аймактагы зомбулук тутануулары палестиналыктардын көптөгөн курмандыктарына алып келди жана [Израилдин] Газаны гана эмес, тарыхый Палестинанын бардык аймактарын палестин эли жашоого жараксыз кылуу аракетинин ажырагыс бөлүгү болуп саналат", - деп баса белгилешет укук коргоочулар.

4-февралда АКШ президенти Израилдин премьер-министри Биньямин Нетаньяху менен Ак үйдөгү сүйлөшүүлөрдөн кийин өткөн биргелешкен басма сөз жыйынында Вашингтон Газанын узак мөөнөттүү башкаруу маселесин карап жатканын жана аны Жакынкы Чыгышта тынчтыкты өнүктүрүү максатында колдонуу ниетин билдирген. Америкалык лидер палестиналыктарды анклавдан башка региондорго көчүрүүгө чакырып, мындай өлкөлөрдүн "буга төлөй ала турганын" айткан. Трамп ошондой эле АКШ зарыл деп тапса, Газага аскер жиберүүгө даяр экенин белгилеген. Араб өлкөлөрү, Иран жана бир катар батыш мамлекеттери бул планга каршы чыгышты. Түркиянын президенти Режеп Тайип Эрдоган АКШнын бул боюнча сунуштарын көңүлгө аларлык деп эсептебей турганын айткан.