15 аскердин өмүрүн алган өрттүн себеби айтылды

Журналист: АЙСУЛУУ ТАЛАНТ

20.01.2023, 12:16

16704

дүйнө жүзүндө

Армениянын Тергөө комитети билдиргендей, Азат айылында жайгашкан аскер бөлүгүндөгү инженер-сапер ротасынын имаратында өрт офицердин мешти бензин менен жагуу аракетинен улам чыккан.

15 адамдын өмүрүн алган өрт конок бөлмөсү жана эки бөлмөсү бар үйдө чыккан, алардын бири курал-жарак сактоочу жай, экинчиси эки кабаттуу аскер керебеттери жайгашкан казарма болгон.

Саат 00:40 чамасында инженердик ротанын нөөмөттө турган капитан чининдеги кызматкери беш литрлик канистр бензин алып, мешти күйгүзүүгө аракет кылган. Натыйжада өрт чыккан.

Өрт тездик менен жайылып кеткендиктен, аскер кызматкерлери имараттан эшик аркылуу чыга албай, сырттагылар эки гана аскерге казармадан чыгууга жардам бере алышкан. Андан кийин аскер кызматкерлеринин бири дубалды тешип, калган аскер кызматчыларын ичиндегилерди алып чыгуу үчүн «Урал» үлгүсүндөгү жүк ташуучу унаа менен имаратты эки жолу сүзгөн, бирок өрт тез тарагандыктан аларды сактап калууга мүмкүн болгон эмес.

Өрттүн кесепетинен 15 адам каза болгонун, алардын баары аскерге чакырылгандар экенин Башкы прокуратура билдирди.

Тергөө комитети Армениянын Кылмыш-жаза кодексинин 532- беренесинин 4-бөлүмү боюнча кылмыш ишин козгоду.

Армениянын коргоо министри Сурен Папикян өрттөн кийин бир нече кишини кызматтан алганын билдирди.

Булак: NazarNews.kg