АКШ Украинага Patriot абадан коргонуу системалары үчүн ракеталарды өз аймагында өндүрүүгө лицензия берүүгө азырынча даяр эмес. Буга технологиялык сырдын сыртка чыгып кетиши жана америкалык курал-жарактын мыйзамсыз сатылышы мүмкүн деген кооптонуу себеп болууда.

Telegraph басылмасынын маалыматына караганда, Вашингтон буга чейин Украинага берилген айрым аскердик жардамдардын Европанын рыногуна чыгып кеткен учурларынан кабардар. Ошондуктан АКШ Киевге Patriot ракеталарын чыгаруунун технологиясын өткөрүп берүүдө жашыруун маалыматтардын коопсуздугуна кепилдик талап кылууда.

Мындан тышкары, Raytheon жана Lockheed Martin компаниялары Украинада Patriot ракеталарын чыгаруу келечекте америкалык өндүрүүчүлөргө атаандаш жаратышы мүмкүн деп кооптонууда.

Бул маселе АКШ өзү Patriot ракеталарына болгон муктаждык күчөп турган учурда көтөрүлүүдө. PAC-3 MSE ракетасынын баасы 2023-жылдагы 3,825 миллион доллардан 2027-жылы дээрлик 5 миллион долларга чейин өсүшү күтүлүүдө. Баанын өсүшүнөн улам АКШ армиясы пландалган сатып алуунун көлөмүн да кыскарткан.

Ошол эле учурда Patriot системаларына суроо-талап акыркы мезгилде кескин өстү. АКШнын өзүндө да запастарга басым күчөп, Вашингтон Украинага керектүү көлөмдө ракета берүү мүмкүнчүлүгүн чектөөгө аргасыз болууда.

Демек, Киевдин Patriot өндүрүшүн өздөштүрүү аракети эки негизги тоскоолдукка, технологиялык коопсуздук жана АКШнын өзүндөгү ракеталардын тартыштыгына туш болууда.