АКШ Зеленский менен вице-президент Жей-Ди Вэнстин Мюнхендеги жолугушуусун өткөрүү үчүн Украинага шарт койгон. Бул тууралуу РБК-Украина агенттиги өз булактарына таянып билдирди: Украина алгач кен казуу боюнча келишимге кол коюшу керек болчу.

"Америкалык тарап баштапкы шарт катары мындай койгон: Вэнс менен Зеленскийдин жеке жолугушуусу, эгер Украина кен казуу боюнча келишимге кол койсо гана болушу мүмкүн. Бирок бул шарт акырында алынып салынды, жолугушуу өткөрүлдү жана РБК-Украина менен баарлашкан бир нече булактардын айтымында, украин делегациясы бул сыноону ийгиликтүү өткөрдү", — деп жазылат маалыматта.

АКШнын президенти Дональд Трамп 3-февралда Вашингтон Киевден каржылык жана аскердик жардамды алуу үчүн сейрек кездешүүчү металлдарды жеткирүү боюнча кепилдиктерди күтүп жатканын билдирген. Ал эми Washington Post гезити, өз булактарына таянып, америкалык расмийлер Мюнхендеги жолугушууда Зеленскийге Украинанын али казыла элек минералдык ресурстарынын 50% укугун АКШга өткөрүп берүү боюнча келишимге кол коюуну сунушташканын жазган.

Зеленский 15-февралда АКШнын вице-президенти Жей-Ди Вэнс менен кен байлыктарына жетүү боюнча келишимге кол коюудан баш тартканын билдирген. Ал "бул сунуш Украина үчүн суверендүүлүккө зыян келтирет" деп белгилеген.

АКШнын Улуттук коопсуздук кеңешинин өкүлү Брайан Хьюз Зеленский АКШ сунуштаган кен байлыктары боюнча келишимден баш тартып, алысты көрө билбей жатат деп сынга алган.