Азербайжанда Кызыл чырым уюмунун өкүлчүлүгү жабылат

Журналист: АЙСУЛУУ ТАЛАНТ

06.03.2025, 13:15

33291

дүйнө жүзүндө

Азербайжандын өкмөтү өлкөдө Кызыл чырым уюмунун өкүлчүлүгүн жабуу тууралуу билдирди. Азербайжандын «АРА« маалымат агенттиги маалымдагандай, Бакунун расмий билдирүүсү боюнча, уюмдун жергиликтүү өкүлчүлүгүнүн учурдагы ишмердүүлүгүнө зарылчылык жок.

Бийлик өкүлдөрү акыркы бир нече жыл ичинде Азербайжан менен уюмдун ортосунда көйгөйлөр болуп келгенин билдирген. Тагырагы, уюм бийликти кабардар кылбастан таанылбаган Тоолуу Карабах Республикасынын борбору Степанакертте (Ханкенди) кеңсе ачып, Азербайжан аймакты көзөмөлгө алып, кийин аймак жоюлгандан соң да аны жабуудан баш тарткан.

Ошондой эле, Баку расмий түрдө БУУнун төрт кеңсесинин - БУУнун Өнүктүрүү программасынын, БУУнун Калк фондунун, БУУнун Качкындар боюнча жогорку комиссар башкармалыгынын жана БУУнун Балдар фондунун (UNICEF) -жабылышы боюнча сунуш киргизди.

Азербайжан бийлиги февраль айынын башында Бакудагы Орус үйүнүн жабылганын, АКШнын Эл аралык өнүктүрүү боюнча агенттигинин (USAID) ишин токтотуу тууралуу маалымат жарыялаган.

Мындан тышкары, Бакуда чет элдик ЖМКлардын өкүлчүлүктөрү да жабылууда. Алардын катарында, «Би-Би-Синин» жана Россиянын мамлекеттик «Sputnik» агенттигинин өкүлчүлүктөрү бар.