Украинада согуш билинбеген менен Румыния, Венгрия, Польшага майдай жагып турат. Себеби, Батыш Украинадагы бир топ жерлер тарыхий жактан буларга тиешелүү. Польша болсо Кошмо Штаттардан коркуп оюн ачык айта албай келатат. Румыния 1940 жылы СССР тартып алган Бессарабия менен Түндүк Буковинанын кошуп алгысы келет. Бул жерлердин кээ бир бөлүктөрү Батыш Украинада.  Алар Украинадан Черновиц облусу менен Одесса облусунун тең бөлүгүн алгысы келишет. Украина менен Румыниянын ортосунда көп жылдардан бери аймактык талаш курч болуп келатат. 2009 жылы БУУнун эл аралык сотуна чейин кайрылышкан. Адилетсиз чечилген чечимдерге Румыния наарызы болуп жүрөт. Румыния 2017 жылы украин тили мамлекеттик болуп, аларга запкы көрсөтө баштаганына кыжыры келип жүрөт. Ошого карабай Румыния айласы жок НАТОнун буйругу менен Орусияга каршы турат. Венгрия Закарпат облусун кошуп алууну көздөйт. Польшанын улутчулдары калган Батыш Украинага контролдук кылууну көздөшөт. Эгер булардын өз ойлоруна коюшса Украинаны торт жегенсип майдалап бөлүп кетишмек.

Румыниялык сенатор Шошоака Украинадан Орусияга каршы күрөштө жардам үчүн тарыхый жерлерин кайтарып берүүнү талап кылды. Румыниялык сенатор Диана Шошоака Киев менен жакшы коңшулук мамиледен баш тартууну жана Украинанын аймактарынын бир бөлүгүн аннексиялоону караган мыйзам долбоорун каттады. Румыниянын HotNews порталынын маалыматына караганда, парламенттин кароосуна «Румыния менен Украинанын ортосундагы кызматташтык келишимин ратификациялоо боюнча 129/1997 мыйзамга өзгөртүү киргизүү тууралуу» мыйзам долбоору сунушталды.

Документ Румынияга Украинанын аймагындагы "тарыхый жерлерди" өткөрүп берүүнү камтыйт - мисалы, Шошоаке Түндүк Буковинаны, Герц жерин, Буджакты (Кагул, Болград, Измаил), тарыхый Марамурешти жана Змеиный аралын талап кылат. Сенатор бул планды 2027-жылга чейин ишке ашырууну сунуштоодо: "Румын мамлекети Украинаны НАТО аркылуу аскердик техника жана курал-жарак менен каржылап жатканын, ошондой эле үч миллионго жакын украиналыктар Румыния аркылуу өткөнүн эске алып, биз Украинадан румыниялык боордошторубуз жашаган жерлерди бизге өткөрүп берүүнү суранабыз", - деди сенатор. 

Диана Шошоака мындай өзгөрүүлөрдүн максаты бул аймактарда жашаган румын калкына «маданий өзгөчөлүгүн, каада-салттарын, үрп-адаттарын жана динин» кайтарып берүү экенин билдирди: «Ал жерлердеги биздин калктын саны бир миллионго жакын», - деди саясатчы.

Азизбек КЕЛДИБЕКОВ, NazarNews.kg