Жогорку Кеңештин депутаты Балбак Түлөбаев "Азаттык" радиосуна берген маегинде Жогорку Кеңештин депутаты Адахан Мадумаровду кылмыш жоопкерчилигине тартуу боюнча Башкы прокуратуранын өтүнүчү тууралуу пикирин билдирди.

"Кемпир-Абад боюнча камалгандар менен чогуу болгон  биздин эки депутаттын аты айтылып жүргөн. Аны депутаттар өздөрү дагы тастыктаган. Мен ойлогом бул боюнча баары бир бир күн келет деп. Мына эми Башкы прокуратура өтүнүч менен келди.

Депутатты кылмыш жоопкерчилигине тартууга макулдук берүү боюнча депутаттык комиссия түзүлгөн. Бир ай ичинде жыйынтык алып келиш керек.

Мен өзүм дагы иликтеп жатам. Депутатты кылмыш жоопкерчилигине тартууга макулдук берүүгө каршы же макул болуу үчүн ишти карап жатам. Азырынча бир чечимге келе элекмин",- деди депутат.

Ал Адахан Мадумаровго карата куугунтук болуп жатат деген пикирде эмес экенин кошумчалады.

Булак: NazarNews.kg