Кыргыз Республикасынын Министрлер кабинети өлкөдөгү негизги автожолдордогу туннелдер аркылуу өткөн унаалар үчүн төлөм киргизүү жөнүндө чечим кабыл алды. Бул тууралуу өкмөттүн басма сөз кызматы билдирди.

Маалыматка ылайык, тиешелүү №134 токтомго 2026-жылдын 25-февралында кол коюлган. Түшкөн каражаттар туннелдерди тейлөө, оңдоо жана коопсуз пайдаланууну камсыз кылууга жумшалат. Төлөмдөр негизинен Бишкек — Ош автожолу жана Түндүк — Түштүк альтернативдүү жолундөгү туннелдерге тиешелүү.

Бишкек — Ош трассасындагы туннелдер үчүн тарифтер:

•    50 сом — жеңил автоунаалар (M1)
•    100 сом — микроавтобустар (M2) жана 3,5 тоннага чейинки жүк унаалары (N1, T5)
•    150 сом — автобустар (M3) жана 3,5–12 тонна жүк унаалары (N2)
•    250 сом — 12 тоннадан жогору оор жүк унаалары (N3)
•    500 сом — атайын техника, комбайндар жана чоң габариттүү унаалар

Түндүк — Түштүк жолундагы Көк-Арт туннели үчүн тарифтер:

•    100 сом — жеңил автоунаалар
•    250 сом — M2, N1 жана T5 категориясындагы транспорт
•    500 сом — автобустар жана жүк унаалары (M3, N2)
•    700 сом — оор жүк унаалары (N3)
•    1000 сом — чиркегичи бар техника, комбайндар жана ири тракторлор

Чет өлкөлүк номерлүү жана транзиттик унаалар үчүн тарифтер:

•    200 сом — жеңил автоунаалар
•    1000 сом — микроавтобустар жана жеңил жүк унаалары
•    1500 сом — 3,5–12 тонна жүк унаалары
•    3000 сом — 12 тоннадан жогору оор жүк унаалары
•    5000 сом — атайын техника жана чоң чиркегичтер

Өкмөттүн маалыматына ылайык, бул төлөмдөрдү киргизүү өлкөдөгү негизги транспорттук жолдордогу туннелдерди туруктуу каржылоо жана коопсуз пайдалануу үчүн керек.