Ош мамлекеттик юридикалык институтунун студенттери ишемби күнү кайрымдуулук акциясын өткөрүштү. ОшМЮИнин тергөө-криминалистика факультетинин демилгеси менен уюштурулган акцияны колдоп чыгышкан студенттер Ош шаарындагы балдар жана боорукердик үйлөрүнө түрдүү азык-түлүктөрдү алып барышты. Айрыкча «Алтын уя» үй-бүлөлүк балдар үйүнүн тарбиялануучулары студенттерди кубануу менен кабыл алышты. Анткени аталган жогорку окуу жайдын студент жаштары бул жерде тарбияланып жаткан балдарды бир тууганындай бооруна басып, жылуу мээримин арнашты. Бул тууралуу маалыматты ОшМЮИнин басма сөз катчысы Сабыр Буркашев билдирди.

Балдар менен бирге отуруп баарлашкан студенттер аларга белектерин берип, таттуу азык-түлүктөрүн таратышты.  Балдар менен кошо кубанган үй-бүлөлүк балдар үйүнүн директору Самара Токтомамбетова студент жаштардын кайрымдуулугуна чын дилинен ыраазычылыгын билдирди.

-«Ыйман, адеп жана маданият» жылынын алкагында уюштурулуп жаткан бул акция  мындан ары да улантылат. Анткени ушундай иш чаралар жаштардын жүрөгүндө боорукердик жана ыймандуулук сезимдерин ойготуп, аларды чыныгы адамгерчиликтүү болууга тарбиялайт,- дейт ОшМЮИнин ректору юридика илимдеринин кандидаты Эгемберди Токторов.

Чындыгында атайын тарбиялык сааттарда студенттерге инсан адеби жана ыймандуулук боюнча пайдалуу кеп-кеңештердин берилип барышы өзүнүн оң натыйжасын көрсөтүүдө. Себеби аталган жогорку окуу жайдын кайрымдуу студенттери мындан ары шаардагы жардамга муктаж үй-бүлөлөргө да  колдоо көрсөтүүгө ниеттенүүдө.

Булак: "NazarNews.kg"