Дагы бир окуучу ур-токмоктон улам көз жумду

Журналист: АЙСУЛУУ ТАЛАНТ

13.02.2025, 10:02

41394

кылмыш жана кырсык

Ош облусунун Кара-Суу районунда 9-класстын окуучусу чоң класстагы бала ур-токмокко алгандан кийин каза болгон. Бул тууралуу облустук милициядан билдиришти.

Милициянын маалыматы боюнча, аларга 12-февралда Каратай айылында 9-класстын окуучусу жерге жыгылып, каза болгону тууралуу маалымат түшкөн.

Окуя боюнча териштирүү учурунда, № 39 орто мектебинин окуучулары өз ара пикир келишпестиктен улам уруша кетишкен. Натыйжада жогоруда белгилеген 9-класстын окуучусу ур-токмоко кабылып, эсин жоготуп кулап калгандыгы маалым болгон.

Кылмышка шектүү катары 2007-жылы туулган Р.Н. аттуу жаш өспүрүм кармалып, убактылуу кармоочу жайга киргизилди.

Бул факты каттоого алынып, тергөө чейинки текшерүү иштери башталган. Өлүмдүн себебин аныктоо үчүн соттук-медициналык экспертиза дайындалган. Аталган иш боюнча кылмыш-жаза кодексинин 130-беренеси (ден-соолукка оор залал келтирүү) менен катталып, кылмыш иши козголгон. Учурда тергөө кызматы тарабынан окуянын чоо-жайын тактоо, ар тараптуу терең иликтөө боюнча тиешелүү иштер алынып барылууда.

Эскерте кетсек, буга чейин Бишкек шаарындагы № 72 мектепте сабалган окуучу ооруканада каза болгону айтылган.