Депутаттар парламенттин жалпы жыйынын активисттер менен саясатчылардын камалышын талкуулоо менен баштоону сунушташты. Эл өкүлдөрү маселени күн тартибине киргизүүнү суранышты.

Депутат Сейидбек Атамбаев өткөн дем алыш күндөрү 20дан ашуун активист, саясатчылар, блогерлер жана журналисттер кармалганын эске салды.

«Алардын айрымдары менен биздин саясий көз караштарыбыз ар башка. Бирок, акыйкаттык үчүн бул туура эмес экенин белгилей кетүү керек. Эртең сага кыйын болуп калса, журналисттерден жардам күтө албайсың. Себеби, өкмөт маалымат каражаттарынын колдоосун жоготуп жатат. Андыктан бул маселени күн тартибине киргизип, жыйынга ички иштер министрин, ЖАКтын жетекчисин жана Акыйкатчыны чакырууну суранам. Бул жакка келип отчет беришсин», - деди Сеидбек Атамбаев.

Депутат Эмил Токтошев камактагылардын арасында эч качан мыйзамды бузбагандар бар экенин белгиледи.

«Асия Сасыкбаева 71 жашта, Гүлнара Журабаева 63 жашта. Булар мыйзамды так аткарган адамдар. Алардын бийликти басып алуу ойлору да жок, мыйзамды да бузган жок. Асия Айтбаевна буга чейин митингге чыгып, Садыр Жапаровду абактан чыгарууну талап кылган. Алар өздөрүнүн позициясын билдиришти. Тажикстанга кол салганда Атай Бейшенбек менен Эрлан Бекчороевдин эмгегин унутпашыбыз керек. Сот аларды үй камагына чыгарса жакшы болмок”, - дейт Эмил Токтошев.

Депутаттарды кесиптештери Дастан Бекешев менен Адахан Мадумаров колдоп, жыйынды массалык камакка алууларды талкуулоо менен баштоону суранышты.

Булак: NazarNews.kg