Президент Дональд Трамп Путин менен "ылайыктуу учурда" жолугушууну каалап жатканын билдирди. Бул тууралуу АКШ президенти Луизианага болгон сапары учурунда Air Force One учагында журналисттерге айтты.

"Мен Путин менен туура убакта жолугушууну каалайт элем", – деди Трамп. Бирок ал орусиялык лидер менен мүмкүн болгон жолугушуулардын деталдарын ачыктоодон баш тартты. "Бул тууралуу азыр айткым келбейт. Эгер сүйлөшүүлөр болсо да, алар тууралуу эрте айткым келбейт", – деп кошумчалады.

АКШ президентинин айтымында, Вашингтондун негизги максаты – Украинадагы жаңжалды токтотуп, жаш жигиттердин өлүмүнө чекит коюу. "Биз Украинадагы согушту токтоткубуз келет, анткени жаш жигиттердин өлүмүнө күбө болуу оор болууда", – деп баса белгиледи ал.

Инаугурацияга чейин же андан кийин Путин менен сүйлөшүүлөр болгонбу деген суроого жооп берип жатып, Трамп мындай байланыштар болгонун ырастап, бирок майда-чүйдөсүн айтуудан баш тартты. "Ооба, болгон. Муну эле айтайын", – деди ал жана келечекте дагы көп сүйлөшүүлөр болушу мүмкүн деген ишенимин билдирди.

"Мен мындан ары дагы сүйлөшүүлөр көбөйөт деп күтүүдөмүн. Бул согушту аякташыбыз керек", – деди Трамп.

Мурдараак Россия президентинин басма сөз катчысы Дмитрий Песков Москва сүйлөшүүлөргө ачык экенин белгилеген. Ал Украинадагы конфликттин жөнгө салынышы сүйлөшүүлөр аркылуу болушу керектигин, бирок азырынча бул багытта конкреттүү кадамдар жок экенин кошумчалаган.