Бишкек шаарынын мэри Эмилбек Абдыкадыров Бишкек шаардык кеңешинин сессиясында таштанды чыгарууга болгон тарифти көтөрүү маселесин талкуулоодо депутаттардын суроолоруна так жооп бербегени үчүн орун басары Жыргалбек Шамыралиевди сынга алды.

Буга чейин депутат Манас Абдылдабек уулу вице-мэр Шамыралиевден таштандыга болгон тарифтер канчага көтөрүлөрү күтүлүп жатканын сураган.

Вице-мэр 86% өсүшү күтүлүүдө деп жооп берди.

"Учурдагы таштанды көйгөйү техниканын жетишсиздигинен жана анын эскилиги жеткендигинен келип чыкты. Мунун баары ишке ашырылат. Контейнерлер жана жабдыктар жаңыланат, таштандылар болбойт, санариптик системаларды киргизүүгө мүмкүнчүлүк түзүлөт», - деп жооп берди Шамыралиев.

"Тактап айтканда, күзгө чейин таштандынын абалы толугу менен оңолобу? - деп сурады депутат Абдылдабек уулу.

Шамыралиев бул бөлүктүн иш планы бар деп жооп бере баштаган, бирок мэр Эмилбек Абдыкадыров сөзгө кошулуп, өзү жооп берерин айтып, вице-мэрди жооптору үчүн сынга ала баштады.

"Бардыгы өзгөрөрүн, шаар таза болуп каларын айтпайсыңбы. Духуң жетпей жатабы? Түз эле жооп бериш керек да, "кыңк-мыңк" дебей, баарыңар саясатчы болуп кеткенсиңер. Сен коркуп жатсаң, мен жооп берем. Кантип иштеп жүрөсүңөр?!" — деди Абдыкадыров.

Депутатка кайрылган мэр: «Шаар таза болот. 74 техника сатып алууга акча бөлдүк. Тендер өткөрүлдү. Төлөндү. Технология жаңыланат. Шаар таза болот. Жер астындагы контейнерлерди орнотобуз. Баарыбыз чогуу тазалайбыз", - деди.

Булак: NazarNews.kg