Европа Биримдиги 2035-жылдан тарта жаңы унаалар толугу менен электр менен гана жүрүшү керек деген талапты жумшартты. Автоөнөр жайдагы кризис жана рыноктун реалдуу абалы бул чечимге түрткү болду. Эми 2035-жылдан кийин да, катуу чектөөлөр жана көмүр кычкыл газынын (CO₂) чыгымдарын компенсациялоо шарттары менен, ички күйүү кыймылдаткычы бар же гибрид унааларды чектелген көлөмдө сатууга уруксат берилет.

Еврокомиссиянын өкүлү Стефан Сежурненин айтымында, бул кадам экологиялык максаттардан баш тартуу эмес, керектөөчүлөрдүн даярдыгын жана автокомпаниялардын мүмкүнчүлүктөрүн эске алган прагматикалык чечим. Анын сөзүнө караганда, европалык автоөнөр жай олуттуу коркунуч алдында турат. Электромобилдер күтүлгөндөй ылдам сатылбай, ал эми кытайлык атаандаштар рынокто үстөмдүк кыла баштады.

Мындан улам Еврокомиссия автоөнөр жайды колдоо үчүн бир катар чараларды жарыялады. Алардын ичинде Европада аккумулятор чыгарган компанияларга 1,5 млрд евро өлчөмүндө пайызсыз насыя берүү, өндүрүштө “Европада жасалган” компоненттерди пайдаланууга артыкчылык берүү бар.

Бул маселе Европа ичинде кызуу талкуу жаратты. Германия, Италия жана Польша ички күйүү кыймылдаткычтарына толук тыюуну кайра кароону талап кылса, Франция менен Испания 2035-жылдагы баштапкы планды өзгөртпөөнү жактады. Акырында Еврокомиссия климаттык максаттар менен экономикалык чындыкты тең салмактоого аракет кылган чечим кабыл алды.