Facebook 650 миллион доллар айыпка жыгылды

Журналист: ПЕРИЗАДА ДҮЙШӨНКУЛОВА

01.03.2021, 21:16

18502

дүйнө жүзүндө

Американын Иллинойс штатынын тургундары Facebook компаниясы адамдын жүзүн таануу технологиясын колдонгондугу үчүн сотко берип 650 миллион доллар төлөттүрүп алды. Бул тууралуу Chicago Tribune гезити жазды.

2015-жылы штаттын жашоочулары Facebook компаниясына каршы доо арыз жазышкан. Анда тургундар компанияны биометрикалык маалымат чогултуу үчүн адамды жүзүнөн таануу технологияларын колдонууда мыйзам бузган деп айыпташкан. Facebook талашты жөнгө салуу үчүн 650 миллион доллар сунуштаган, андан мурда компания 550 миллион берерин айткан. Бирок Сан-Францисконун аймактык соту бул сумманын жетиштүү экенинен күмөн санаган.

Соттун чечимине ылайык, штаттагы 1,6 миллион тургундун сотко кайрылгандарынын ар бири компенсация катары 345 доллардан алмай болду. Каражаттын бир бөлүгү юристтин ишине жумшалат.

Маалыматта Facebook мындан ары жүздү таануу автоматтык технологиясын колдонбой турганы белгиленди. Компания колдонуучулар буга чейин деле жүздү таануу функциясын колдонуу же колдонбоону өздөрү чечип келгенин, бирок эми ал кызмат өчүк болоорун, каалоочулар баракчанын тескөө бөлүмүнөн иштетип алса болоорун айтышты.

Булак: NazarNews.kg