Бүгүн, 3-июнда Жогорку Кеңештин депутаты Ирина Карамушкина УКМК тарабынан өндүрүлүп жаткан каражаттын эсеп-кысабын ачык көрсөтүүнү талап кылды.

Ошондой эле, ал парламенттин жыйынында жарандарды жана анын арасында эл өкүлүнүн өзүн да соттун чечими же башка жолдор менен алынган акча кайда кетип жатканы кызыктырганын белгиледи.

«УКМК киреше булагын декларациялабаган адамдар менен бюджетти толтуруу саясатын жүргүзүүдө. Акча казыналык аркылуу өтүп бюджетке түшүп жатабы деген суроо жаралат. Ачык көрсөтүлбөгөндүктөн ишенбөөчүлүк пайда болду. Андыктан өкмөттүн же УКМКнын сайтына кимден канча түшкөнүн жана эмнеге жумшалганын жарыялашын сурайм», — деди Карамушкина.

Депутат ачык-айкындуулук болгондон кийин гана бийликке ишеним болорун кошумчалады.

Булак: NazarNews.kg