Казакстан Кыргызстанга аскердик-техникалык жардам көрсөтмөй болду. Мындай чечим кыргыз-казак өкмөт башчылары Акылбек Жапаров менен Аскар Маминдин Нур-Султандагы сүйлөшүүлөрүнөн кийин кабыл алынганын коңшу өлкө өкмөтүнүн маалымат кызматы билдирди.

Өкмөт башчылар соода-экономикалык, инвестициялык, суу, энергетика, транзиттик-транспорттук, аскердик-техникалык чөйрөлөрдөгү, агроөнөр жай комплекси, өнөр жай кооперациясы жана саламаттыкты сактоо тармагындагы кызматташуунун актуалдуу маселелерин талкуулашты.

Сүйлөшүүлөрдүн жыйынтыгында Борбордук Азия аймагынын коопсуздугун камсыздоо алкагында Кыргызстанга акысыз аскердик-техникалык жардам көрсөтүү жөнүндө өкмөттөр аралык макулдашууга кол коюлду.

Эки өлкөнүн Саламаттыкты сактоо министрликтери 2021-2023-жылдарга саламаттык сактоо тармагында референс-лабораторияларды өнүктүрүү боюнча чаралар планын бекитишти.

Казакстандын Соода жана интеграция министрлиги менен Кыргызстандын Экономика жана коммерция министрлиги "Карасу" жана "Ак-Тилек" өткөрмө пунктуларынын аймагында, ошондой эле Кыргызстандын аймагындагы үч дүң соода борборунда өнөр жай, соода-логистикалык комплексин түзүү жана иштетүү боюнча биргелешкен иш-чаралардын планын кабыл алышты.

Нур-Султанга жасаган иш сапарынын алкагында Акылбек Жапаровдун Казакстандын мамлекет башчысы Касым-Жомарт Токаев жана өлкөнүн биринчи президенти Нурсултан Назарбаев менен жолугушуусу пландалган. Мындан сырткары, Астана эл аралык каржы борборуна, Санариптик өкмөттүн кеңсесине жана башка объектилерге барары каралган.

Булак: NazarNews.kg