Кыргызстанда 2026-жылдын январь–июль айларында ички дүң продукциянын (ИДП) көлөмү 1 триллион 172,7 миллиард сомду түздү.

Бул тууралуу Министрлер Кабинетинин Төрагасы Адылбек Касымалиев аппараттык кеңешмеде билдирди.

Алдын ала маалыматтарга ылайык, өлкөнүн ИДПсы өткөн жылдын ушул мезгилине салыштырмалуу реалдуу түрдө 11,1% өскөн.

Экономикалык өсүшкө негизги тармактардын баары оң салым кошкон. Анын ичинде:
курулуш тармагы – 60,6%;
кызмат көрсөтүү чөйрөсү – 6,1%;
айыл чарбасы – 6%;
өнөр жай – 11,2% өскөн.
Өнөр жай тармагында химиялык продукция өндүрүү 2,9 эсеге, тазартылган мунайзаттарды өндүрүү 1,8 эсеге көбөйгөн. Ошондой эле транспорт каражаттарын өндүрүү 41,8%, курулуш материалдарын өндүрүү 33,6%, пайдалуу кендерди казып алуу 16,9%, фармацевтикалык продукция өндүрүү 13%, негизги металлдарды өндүрүү 8,5%, азык-түлүк өндүрүү 2,4% өскөн.

Касымалиевдин айтымында, 2026-жылдын башынан бери негизги капиталга инвестиция салуунун да рекорддук өсүшү катталган. Инвестициялардын жалпы көлөмү 238,3 млрд сомду түзүп, былтыркы ушул мезгилге салыштырмалуу 58,8% көбөйгөн.

Мындан тышкары, чакан жана орто ишкерликти колдоо чараларынын натыйжасында бул сектордо да өсүш байкалган.

Алдын ала маалымат боюнча, 2025-жылы чакан жана орто ишканалар өндүргөн жалпы кошумча нарк 54,5% өсүп, 1 триллион 15 млрд сомго жеткен. 2024-жылы бул көрсөткүч 657,1 млрд сомду түзгөн.

Ошондой эле ЧОИнин ИДПдагы үлүшү 41,5%дан 51,4%га чейин өскөн. Чакан жана орто ишканалардын саны 6,8% көбөйүп, 27,3 миңге жеткен.

ЧОИ жана жеке ишкердик тармагында иштегендердин саны да 6,8% өсүп, 643,8 миң адамды түзгөн.